Дәрігерлер жауапкершілігін арттыру керек

Басқосуды басқарма басшысының міндетін атқарушы Майра Егембер­диева ашып, өткен жылды қорытын­ды­лап, ағымдағы жылы алға қойған мақ­саттарды пысықтады.

Баяндамашы елдің денсаулығын түзету барысындағы жасалып жатқан жанды көмектерге тоқталды. Облыс тұрғындарына барлығы 935 емдеу мекемесі қызмет көрсетеді. Олардың 777-сі мемлекеттік, 158-і жекеменшік.

Бір сырқаттың ауруханада жа­тып, емделіп шығуы үшін бөлінетін қаржы 77 250 теңгені құрайды. Облыс тұрғындарының орташа өмір сүру жасы 2013 жылы 70,7-ні құраған болса, 2014 жылы 71,6-ға дейін ұзарды,– деді облыстың бас дәрігерінің міндетін атқарушы. Соңғы жыл­дары ауыл халқының ден­саулығын қадағалауға да ерекше мән берілуде. Осының нәтижесінде әлеу­меттік маңызы бар сырқаттардың дең­гейі төмендеді. Мысалы, Ақсу, Еңбек­шіқазақ, Іле, Көксу және Панфи­лов аудандарында бес жылжымалы меди­циналық кешен шалғайда жатқан ауыл тұрғындарына арнайы барып, меди­циналық көмек көрсетуде. Ана мен балаға ерекше күтім жасалуда. Осы­ның нәтижесінде демографиялық өсім ауыз толтырып айтарлық.

Мысалы, 2013 жылы дүниеге 38408 бала келсе, 2014 жылы туған сәби саны 41 400-ге жеткен. Ана мен бала денсаулығын қадағалайтын және кеңес беретін 48 орталық бар.

Алқада Қазақстан Республикасы Денсаулық сақтау және әлеуметтік даму министрлігі медициналық қыз­мет­ке ақы төлеу комитетінің Алматы облысы бойынша департаменті рес­пуб­ликалық мемлекеттік мекемесінің басшысы Мақсұт Қалажанов медици­наға бөлінген қаржыны тиімді пайда­лану, ем-домды дұрыс жасау жайында көптің көңіліндегі түйткілді ойды қозғады. Бас дәрігерлердің мемлекет қалтасы мен өз қалтасын шатастырып алмауын салмақтады.

Жиында Санжар Асфендияров атындағы Қазақ ұлттық медициналық университетінің ректоры Айқан Ақа­нов сөз алды. Дәрігерлер даярлайтын қара шаңырақтың бүгінгі басшысы әңгімені медицина саласындағы олқы­лық­тардан бастады. Ол: «Қазіргі таңда медицина саласына көптеген жаңа­лық енгізілуде. Заманауи құрал-жабдықтар керегінше сатып алынуда. Осынша жағдай жасалып жатқанына қарамас­тан халыққа қызмет көрсету өз дәре­жесінде емес. Денсаулық сақтау саласы қызметкерлері Гиппократ ан­тын қа­был­дағанымен, орындауға кел­генде салғырт. Медицина мекеме­ле­рі­нің бас дәрігерлері өздерін қара­пайым халық­тың қолы жетпес дөкейі сезінеді. Сон­дықтан біз болашақта «Бас дәрі­гер­лер мектебін» ашпақпыз. Онда бас дәрі­герлер мен сол лауазымға үміткерлерге жұмысты қалай ұйым­дастыруды үй­рет­пекшіміз. Медицина мекемелерінде тұрғындарға қызмет көрсетуді жан­дан­дырудың бір жолы – бәсекелестікті арттыру. Яғни, жеке­мен­шік меке­мелердің сапалы жұмыс іс­теуіне көңіл бөлу керек. Мысалы, об­лысымызда «Ақбұлақ» атты шипа­жай бар. Әзірге оны мүмкіндігіне сай пай­даланбай келеміз. Тек жеке адамдар ба­ра­тын демалыс орны іспетті. Ал оны бола­шақ­та инфаркт, инсульт алған сыр­қаттардың денсаулығын қалпына кел­тіру мекемесіне айналдырсақ, құба-құп болар еді. Облыста оңалту орта­лық­тары аз. Ауруханадан шыққаннан кейін де ағзадағы кем-кетікті дәрігерлер қада­ғалап, қалпына келгенше ем-дом жасауы тиіс. Сондықтан «Ақбұлақты» оңалту орталығына айналдыру кезек күттірмес шара. Диабет орталығын ашу да өзекті мәселе. Осы сырқаттың салдарынан жылына бірнеше мыңдаған адам қан айналымы жүйесі бұзылған­дықтан қол-аяғынан айырылады. Ем дұрыс жүргізілмейді. Білікті мамандар қат. Сусамырмен сырқаттанушылар қатары өсіп барады. Керек десеңіз, осы дертке анасының құрсағында жатып шалдық­қандар қатарының көбейіп келе жат­қа­ны алаңдатарлық жағдай. Егер ар­найы орталық ашылса, дерттің алдын алар едік. Сіздердің облысқа қызметке келген кардиохирургтер қайта кетіп қалып жатыр. Оның себебі не? Келген маманды қалай да жібермей ұстап қалу керек емес пе?

Біз интерн-мамандарды облысқа жібергенде әлеуметтік қызметтерді атқартуға, шалғай ауыл халқының денсаулығын қадағалатуға пайдаланып алмайсыздар ма? Олар деген тегін күш қой. Мен жас мамандарды «табанын тіліп» жұмыс істеткенді жақсы көрем. Басы қатты болса, аяғы тәтті болады», – дейді дәрігерлер даярлайтын білім ордасының басшысы.

Алқада медицина саласының көп­теген өзекті мәселесі әңгіме арқауына айналды. Мамандардың біліктілігі мен қыз­мет сапасын арттыру жайы басқо­судың жүгін көтерді.

Гүлжан ТҰРСЫН

Жетісу газеті