Көз аурулары ғылыми-зерттеу институтында профессор Жанар Ғабиденқызы Мұстафинаның мемориалдық тақтасы ашылды
Бүгін Алматы қаласындағы Қазақ көз аурулары ғылыми-зерттеу институтында көрнекті ғалым-офтальмолог, Қазақстан Республикасының еңбек сіңірген дәрігері, профессор Жанар Ғабиденқызы Мұстафинаның құрметіне арналған мемориалдық тақтаның салтанатты ашылу рәсімі өтті.
Жанар Ғабиденқызы Мұстафина – отандық офтальмология ғылымының дамуына елеулі үлес қосқан көрнекті тұлғалардың бірі. Ол 1960 жылы Алматы мемлекеттік медицина институтын (қазіргі С.Ж. Асфендияров атындағы ҚазҰМУ) бітіріп, ғылыми және клиникалық еңбек жолын Қазақ көз аурулары ғылыми-зерттеу институтында бастады. Ғалымның бүкіл кәсіби қызметі осы ғылыми орталықпен тығыз байланысты болды.
Әр жылдары ол институтта жауапты ғылыми және басқарушылық қызметтер атқарып, 1987–2001 жылдары аталған ғылыми-зерттеу институтын басқарды. Оның басшылығы кезеңінде еліміздегі офтальмология ғылымы мен мамандандырылған медициналық көмектің дамуына бағытталған маңызды ғылыми және ұйымдастырушылық бастамалар жүзеге асырылды.
Ғалымның өмір жолында С.Ж. Асфендияров атындағы Қазақ ұлттық медицина университетінің орны ерекше. Ол өзінің Alma mater-імен ұзақ жылдар бойы байланысын үзбей, университет ректорының тәрбие жұмыстары жөніндегі кеңесшісі қызметін атқарып, болашақ дәрігерлердің кәсіби және адамгершілік құндылықтарын қалыптастыруға айрықша үлес қосты.
Салтанатты рәсім барысында С.Ж. Асфендияров атындағы Қазақ ұлттық медицина университетінің атынан қатысушыларды университеттің бірінші проректоры Диляра Қайдарова құттықтап, университет ректоры Марат Шорановтың құттықтау хатын оқып берді.
Ректордың құттықтауында: «Жанар Ғабиденқызы Мұстафинаның есімі Қазақ ұлттық медицина университеті үшін айрықша құрметке ие. Ол – университетіміздің түлегі әрі ұзақ жылдар бойы үлкен университет қауымдастығының белсенді мүшесі болды. Оның еңбегі тек ғылыми жетістіктермен ғана шектелмейді. Ол еліміздің барлық өңірлерінде қызмет етіп жүрген дәрігерлер буынын тәрбиелеуге зор үлес қосты. Мемориалдық тақтаның ашылуы – бүкіл ғұмырын медицина мен адам игілігіне арнаған тұлғаға деген терең құрметтің белгісі», – деп атап өтілді.
Мемориалдық тақтаның ашылуы көрнекті ғалымның офтальмология ғылымының дамуына, медициналық білім беруге және Қазақстанның денсаулық сақтау жүйесіне қосқан елеулі үлесін айқындайтын маңызды оқиға болды.
Өз сөзінде Диляра Қайдарова профессор Жанар Ғабиденқызы Мұстафинаның отандық офтальмология ғылымының дамуына қосқан зор үлесін атап өтіп, оның есімі мен еңбегі дәрігерлердің бірнеше буыны үшін кәсіби үлгі болып қала беретінін айтты.
