Студент қатарына қабылдау-2016
2016 жылғы 6 қазан күні «Concordia» театрында С.Ж. Асфендияров атындағы Қазақ Ұлттық медицина университетінің 1-курс студенттерін студент қатарына қабылдау рәсімі өтті. Биыл аталмыш оқу орнына 1280 талапкер қабылданған болатын.
Студент қатарына қабылдау салтанаты университет ректорының м.а. профессор Нұргүл Қалиқызы Хамзинаның құттықтау сөзімен ашылды. Содан соң С.Ж. Асфендияров атындағы ҚазҰМУ-дың Бақылау кеңесінің төрағасы, «Ұлттық ғылыми кардиохирургия орталығы» АҚ басқармасының төрағасы Юрий Владимирович Пя жас студенттерді құттықтап, білім жолында табыс тіледі.
Студент қатарына салтанатты түрде қабылданатын ерекше мерекелік күні ҚазҰМУ-дың Құрметті профессоры, медицина ғылымдарының докторы Александр Дмитриевич Соколовтың қолынан дәстүр бойынша 1-курс студентіне «студенттік билет» табыс етілді.
Салтанатты рәсімнен кейін іс-шара қонақтарына, студенттерге концерттік бағдарлама ұйымдастырылды. Концерттік бағдарламада «Хассак» этно-фольклорлық ансамблі, Құрманғазы атындағы Қазақ ұлттық консерваториясының күйшілері, «Классик» квартеті, «ST Brothers» этно-джаз дуэті өнер көрсетті.
Сондай-ақ, университетіміздің таланттары: қобыз аспабында жеке орындаушы Мырзалиев Ерболат, қос әнші – Орынбасар Шаттық пен Рахмет Ермек және ҚазҰМУ студенттер «Concordiа» би ансамблі өз өнерлерін ортаға салды.
ҚазҰМУ-дың Баспасөз қызметі
