Ташкентте Қазақстан және Өзбекстан денсаулық сақтау министрлерінің қатысуымен ҚазҰМУ жас ғалымдарының ғылыми жобалар көрмесі өтті
Өзбекстандағы Қазақстан медицинасы күндері аясында Ташкент медицина академиясының базасында С. Ж. Асфендияров атындағы Қазақ ұлттық медицина университетінің жас ғалымдарының ғылыми жобалар көрмесі өтті.
Көрмеге Қазақстан мен Өзбекстанның денсаулық сақтау министрлері, екі елдің медициналық жоғары оқу орындарының ректорлары мен делегациялары қатысты.
ҚР Денсаулық сақтау министрі Ақмарал Әлназарова мен Өзбекстан Республикасының Денсаулық сақтау министрі Асилбек Худаяров ҚазҰМУ-дың жас ғалымдарының ғылыми жобаларымен танысып, олардың инновациялық шешімдерін жоғары бағалады.
Экспозицияда магистранттар, интерндер, резиденттер және университеттің ғылыми қызметкерлері ұсынған жасанды интеллект пен медициналық технологиялар саласындағы жобалар таныстырылды.
Көрмеде цифрлық технологиялар мен денсаулық сақтау саласының тоғысындағы инновациялық шешімдерге ерекше назар аударылды. Мұндай жобалар диагностиканың, емдеудің және медициналық үдерістерді басқарудың тиімділігін арттыруға мүмкіндік береді.
ҚазҰМУ хакатон резиденттері медицинадағы жасанды интеллектке арналған келесі ғылыми жобаларды ұсынды:
Тимур Фазылов, ҚазҰМУ ғылыми қызметкері – төрт жоба:
• көру қабілеті бұзылған адамдарға арналған «ақылды таяқ»;
• операциядан кейінгі жабысу процесінің алдын алуға арналған құрылғы;
• диабеттік табанды бақылауға арналған «ақылды стелька»;
• ұрық жүрек соғысын бақылауға арналған Smart Baby Cardiography жобасы.
Екатерина Колоскова, микробиология және вирусология кафедрасының қауымдастырылған профессоры – Virtual Microbiology Lab жобасы. Бұл виртуалды зертхана студенттерге микробиология пәнін қауіпсіз әрі көрнекі форматта меңгеруге мүмкіндік береді.
Карина Секенова, ҚазҰМУ-дың 6-курс интерні – NeuroGuard AI жобасы, жасанды интеллект көмегімен ми ауруларын ерте анықтауға бағытталған.
Үкілі Омарова, хакатон резиденті – Soile AI жобасы, сөйлеу ақауларын жасанды интеллект арқылы талдауға және анықтауға мүмкіндік береді.
Сабина Байтемирова, хакатон резиденті – FaceBody Analytics (FAB) жобасы, адамның беті мен денесінің 3D-моделі негізінде денсаулық жағдайын бағалауға арналған.
Сергей Швец, ҚазҰМУ-дың 2-курс магистранты – 3DLabAI жобасы, жасанды интеллект интеграцияланған 3D модельдеу, басып шығару және сканерлеу зертханасы. Бұл жоба оқу үдерісін жеделдетіп, болашақ дәрігерлердің тәжірибесін нақты үлгілер негізінде дамытуға бағытталған.
Алуа Абдикадырова, ҚазҰМУ-дың 6-курс интерні – AllerGuard жобасы, аллергиялық қауіп-қатерлерді бақылау және ескертуге арналған инновациялық жүйе. Пайдаланушылар өз жағдайына сәйкес жеке ұсынымдар мен хабарламалар ала алады.
Көрме жас ғалымдар үшін тәжірибе және идеялар алмасудың маңызды алаңына айналды.
Ұсынылған жобалар ҚазҰМУ жас зерттеушілерінің қазіргі заманғы медицина мен цифрлық технологияларды дамытудағы жоғары әлеуетін көрсетіп, Қазақстан мен Өзбекстан арасындағы ғылыми ынтымақтастықты нығайта түсті.
