ҚазҰМУ-да академик Галина Мельниченконың шеберлік сабақтары басталды
С.Ж. Асфендияров атындағы Қазақ ұлттық медицина университетіне визитинг-профессор бағдарламасымен Ресей ғылым академиясының академигі, медицина ғылымдарының докторы, профессор Галина Афанасьевна Мельниченко келді. Эндокринология саласындағы белгілі ғалым 2026 жылғы 14–26 қыркүйек күндері университеттің эндокринология кафедрасында шеберлік сабақтарын өткізіп, ғылыми және клиникалық талқылауларға қатысады.
Сапар бағдарламасына резиденттер, магистранттар, докторанттар, жас ғалымдар мен дәрігерлер қатысады. Осы күндері кафедрада шеберлік сабақтары, ғылыми кездесулер мен клиникалық талқылаулар өтеді.
Алғашқы шеберлік сабағында лабомиканың омикс технологияларымен байланысы қарастырылды. Қатысушылар заманауи зертханалық диагностиканың мүмкіндіктерін, жоғары технологиялық бейнелеу әдістерін және оларды күрделі клиникалық жағдайларда қолдану жолдарын талқылады.
Сабақта зерттеу нәтижелерін науқастың жалпы жағдайымен байланыстыра бағалауға баса мән берілді. Зертханалық көрсеткіштерді УДЗ, КТ, МРТ, ПЭТ және ОФЭКТ/КТ-сцинтиграфия деректерімен салыстырып, аурудың клиникалық белгілерімен бірге қарастыру жолдары түсіндірілді. Осы мәліметтерге сүйене отырып, ауруларды бір-бірінен ажырату, диагнозды нақтылау және әрі қарайғы тексеру мен емдеу тәсілдерін таңдау мәселелері талданды.
Аурудың даму механизмдерін түсіну және осы білімді дәрігерлік шешім қабылдауда қолдану Галина Мельниченконың ғылыми ұстанымында маңызды орын алады. Ғалым нейроэндокринология, тиреоидология, бүйрекүсті бездерінің патологиясы, гипоталамус-гипофиз жүйесі және сирек кездесетін эндокриндік аурулар мәселелерін зерттейді.
Профессор көпжылдық ғылыми және дәрігерлік қызметінде ірі ғылыми мектеп қалыптастырды. Оның 700-ден астам ғылыми жарияланымы мен 10-нан астам монографиясы жарық көрген. Жетекшілігімен ондаған ғылым докторы мен кандидаты даярланған.
ҚазҰМУ-дағы бағдарлама 26 қыркүйекке дейін жалғасады. Алдағы сабақтар мен кездесулерде университет оқытушылары, дәрігерлер және жас зерттеушілер Галина Мельниченкомен ғылыми әрі практикалық мәселелерді талқылап, тәжірибе алмасады.
