ҚазҰМУ студенттері «Жұбанов көктемі – 2018» Республикалық жастар форумына қатысты
2018 жылдың 19-20 мамыр күндері С.Ж.Асфендияров атындағы ҚазҰМУ «Alma Mater» Дебат клубының мүшелері, жалпы медицина мектебінің 4 курс студенттері Сандыбек Алибек, Бердіхан Мукасан, Калдыбек Дулат, Акылбек Ғани Қ.Жұбанов атындағы Ақтөбе өңірлік мемлекеттік университетінде Қазақстан Республикасының Президенті Н.Назарбаевтың «Болашаққа бағдар: рухани жаңғыру» бағдарламасы және Астананың 20 жылдығы аясында ұйымдастырылған «Жұбанов көктемі – 2018» Республикалық жастар форумының «ZHUBANOV CUP» атты Республикалық пікірсайыс турниріне қатысты.
Республикалық форумға Қазақстанның бес облысы Астана, Алматы, Қостанай, Орал және Ақтөбе қалаларының 28 жоғары оқу орындарынан 100 аса делегаттар қатысты. Форум барысында студенттер Ақтөбенің көрнекті орындарымен танысып, облыстық планетарийге және Алға ауданындағы Тама Есет Көкіұлы кесенесіне, Ә.Молдағұлованың облыстық мемориалдық музейіне барды.
«ZHUBANOV CUP» Республикалық дебат турнирі нәтижесі бойынша «Alma Mater» Дебат клубының көшбасшылары Сандыбек Алибек пен Бердіхан Мукасан ІІ жүлделі орын иегері атанды. Студенттерді жеңістерімен құттықтай отырып, алдағы уақытта тек жетістіктер және жүлделі орындар тілейміз!
Жастар саясаты басқармасы
