ҚазҰМУ Фармация мектебі студенттерінің Санкт-Петербург мемлекеттік химия-фармацевтикалық университетінде академиялық ұтқырлығы
2026 жылғы 2 ақпаннан бастап көктемгі семестрде С.Ж. Асфендияров атындағы Қазақ ұлттық медицина университеті Фармация мектебінің В072 – «Фармацевтикалық өндіріс технологиясы» білім беру бағдарламасы студенттерінің академиялық ұтқырлық бағдарламасы басталды. Бағдарлама Қазақстан Республикасының Денсаулық сақтау министрлігіне қарасты серіктес жоғары оқу орны — «Санкт-Петербург мемлекеттік химия-фармацевтикалық университеті» федералдық мемлекеттік бюджеттік жоғары білім беру мекемесімен ынтымақтастық аясында жүзеге асырылуда.
ҚазҰМУ-дің Академиялық саясатына сәйкес Университет комиссиясы өткізген конкурстық іріктеу қорытындысы бойынша 2–3 курс аралығындағы 20 студент өздерінің білім беру және кәсіби ниеттерін сәтті қорғап, ТМД елдері мен Шығыс Еуропа үшін фармацевтикалық индустрия саласында жоғары білікті мамандар даярлайтын жетекші университеттердің бірінде білім алу мүмкіндігіне ие болды.
Аталған академиялық ұтқырлықтың негізгі мақсаттары:
- серіктес жоғары оқу орнында білім беру пәндері мен модульдерін меңгеру арқылы студенттердің кәсіби даярлығының сапасын арттыру;
- фармацевтикалық өндіріс технологиясы саласындағы теориялық білім мен практикалық дағдыларды тереңдету;
- фармацевтика саласындағы озық білім беру, ғылыми және өндірістік тәжірибелермен танысу;
- ғылыми-зерттеу құзыреттерін дамыту және ғылыми қызметке қызығушылық қалыптастыру;
- студенттердің академиялық және мәдени көкжиегін кеңейту, мәдениетаралық коммуникация мен академиялық интеграцияны дамыту;
- серіктес жоғары оқу орындары арасындағы халықаралық ынтымақтастық пен академиялық байланыстарды нығайту.
Академиялық ұтқырлық аясында СПХФУ-да оқитын студенттердің күтілетін оқу нәтижелері:
ФГБОУ ВО СПХФУ-дың оқу, ғылыми-зерттеу және тәрбиелік қызметіне белсенді қатысу, оның ішінде:
- серіктес жоғары оқу орнының профессор-оқытушылар құрамы жетекшілігімен ғылыми-зерттеу жұмыстарын орындау;
- университеттің ғылыми, білім беру және спорттық іс-шараларына қатысу;
- серіктес жоғары оқу орнының ППС-мен және ҚазҰМУ Фармация мектебінің эдвайзерлерімен бірлесіп жеке білім беру траекторияларын қалыптастыру;
- фармацевтикалық өндірісте қолданылатын заманауи әдістер мен технологияларды меңгеру.
Академиялық ұтқырлық бағдарламасын іске асыру студенттердің кәсіби даярлық деңгейін арттыруға, халықаралық академиялық тәжірибе жинақтауға және Қазақстан Республикасының фармацевтикалық саласының кадрлық әлеуетін дамытуға үлес қосуға мүмкіндік береді.
Бағдарламаға қатысушыларға оқуында табыс, ғылыми жетістіктер және елімізден тыс жерде нәтижелі әрі жемісті жұмыс тілейміз.
