Асфендияров атындағы ҚазҰМУ-да жаңа ректор тағайындалды (Фото)
ҚР Денсаулық сақтау министрі Елжан Біртанов С.Ж. Асфендияров атындағы Қазақ Ұлттық медицина университеті ұжымы және Алматы қ. медицина саласындағы қоғам өкілдеріне ҚазҰМУ-дың жаңа ректоры Талғат Нұрғожинді таныстырды.
Еліміздегі 87-жылдық тарихы бар көне жоғары оқу орнының бұл 14-ші ректоры болып табылады.
Айта кетсек, 2016 жылдың ақпан айынан білім ордасы бір жарым жыл мерзім аралығы ректорсыз болған еді.
Ведомство Басшысы жаңа ректордың медицина саласындағы айтарлықтай қызмет өтілін ерекше атап өтті.
«Денсаулық сақтау министрлігінің атынан және жеке өз атымнан қуанышымды білдіре отырып, Талғат Сейтжанұлын ректор қызметіне тағайындалуымен құттықтаймын. Қызметіне сәттілік, зор денсаулық тілеймін», — деді Елжан Биртанов.
Академиктер Төрегелді Шарманов пен Камал Ормантаев жаңа ректорды жылы қабылдап, Талғат Нұрғожинге жаңа қызмет орнында сәттілік тіледі. «Біз бұл сәтті ұзақ күткен едік. Алдыңғы қатарлы оқу орнымыз, киелі қара шаңырағымызда бүгін ерекше күн. Оған дейін ұзақ уақыт алаңдадық. Енді, міне, ректор қызметіне тағайындалған Талғат Сейтжанұлына сенім білдіріп, ұжымымыз атынан алдағы уақытта жоспар бойынша атқарар міндеттерді толықтай жүзеге асыратын боламыз. Университетіміздің бай тарихы мен дәстүрлі құндылықтары оған жетекші болмақ. Оқу орнымызды дамыту бойынша қызметіңізге және атқарар ауқымды жобаларды жүзеге асыруда сәттілік тілейміз», — деді Төрегелді Шарманов.
Талғат Нұрғожин бұған дейін эксперименталды клиникалық фармакология және фармация ҒЗИ, Назарбаев Университеті жанындағы»National Laboratory Astana» мекемесінің Өмір туралы ғылымдар орталығын басқарған.
Медицина ғылымдарының докторы 1992 жылы Томск мемлекеттік медициналық университетін бітірген.
2006-2009 жылдары Алматы мемлекеттік дәрігерлердің біліктілігін арттыру институтының емдеу ісі бойынша проректоры, 2009-2011 жылдары Ұлттық медицина холдингінде басқарушы директор қызметін атқарған.
Айта кету керек, С.Ж. Асфендияров атындағы Қазақ Ұлттық мемлекеттік университетін 2008-2016 жылдары Айқан Ақанов басқарып келген болатын.
Ол кісі қайтыс болғаннан кейін аталған оқу орнында ректор тағайындалған жоқ.
Оған дейін оқу орнын Талғат Мүмінов (1995-2008), Евгений Белозеров (1987-1995), Қуаныш Маскеев (1975-1986), Роман Самарин (1969-1987), Иван Корякин (1955-1960), Семен Сидоров (1954-1955), Сибұғатулла Қарынбаев (1963-1975), Василий Зюзин (1944-1964), Виктор Зикеев (1934-1943), Харира Мухамбетова (1933-1934), Исенғали Қасаболатов (1931-1933) басқарды. Ең алғаш рет құрылған кезде университет ректоры Санжар Асфендияров (1930-1931) болған еді.
ҚазҰМУ-дың Баспасөз қызметі
