Барселонадағы 17-ші Халықаралық инсульт конгресі: білім алмасу, жаһандық стратегиялар және пациенттерге көмектің жаңа көкжиектері
2025 жылдың 20-24 қазан аралығында Барселона қаласы неврологияның халықаралық астанасына айналды. Мұнда Дүниежүзілік инсультпен күрес ұйымы (WSO) ұйымдастырған Дүниежүзілік инсульт конгресі (WSC) және WSO-мен бірлесе отырып, Дүниежүзілік нейрореабилитация федерациясы (WFNR) өткізген реабилитация курстарының бөлімі өтті.
Реабилитация курстары Vall d’Hebron университеттік госпиталінде өтті. Бұл госпиталь 1955 жылы құрылған және Каталония денсаулық сақтау институтына қарайды. Vall d’Hebron университеттік госпиталі – Испаниядағы Каталония өңіріндегі ең ірі медициналық қызмет көрсететін кешен болып табылады.
WFNR нейрореабилитация туралы ақпаратты арттырумен, оқыту және білім беру бағдарламаларын өткізумен, зерттеулер мен ынтымақтастықты дамытумен, сондай-ақ осы тақырыпқа қызығушылық танытқан мамандардың өзара байланыс алаңын қалыптастырумен айналысады.
Оқыту курсы WSC-2025 қарсаңында өтіп, нейрореабилитация саласындағы заманауи жетістіктерге арналды: афазия мен когнитивтік реабилитация, дисфагия, қимыл-қозғалысты қалпына келтіру мәселелері қаралды. Білім беру модульдері қысқа әрі мазмұнды форматта, клиникалық тәжірибеге нақты бағытталған түрде ұйымдастырылды. Курстың үйлестірушілері: WFNR президенті профессор, доктор Волкер Хёмберг, WSO президенті профессор, доктор Джейарадж Пандиан, EFNR президенті профессор, доктор Дафин Ф. Мурешану болды.
17-ші Халықаралық инсульт конгресі 22-24 қазан аралығында өтті. Форумға әлемнің 100-ден астам елінен келген 4 000-нан астам қатысушы – жетекші неврологтар, нейрохирургтер, реабилитологтар, пациенттік қауымдастықтардың өкілдері және зерттеушілер жиналды. Конгрестің басты мақсаты – инсульттің алдын алу, диагностикасы, емі және реабилитациясы саласындағы соңғы ғылыми деректер мен тәжірибелік жетістіктермен алмасу болды.
Қазақстан делегациясын С. Д. Асфендияров атындағы Қазақ ұлттық медицина университетінің (Алматы) жүйке аурулары кафедрасының меңгерушісі Туруспекова Сауле Тлеубергеновна және академик Н. Д. Батпанов атындағы Ұлттық травматология және ортопедия ғылыми орталығының (Астана) PhD, доцент Минбаева Лариса Сергеевна таныстырды.
Негізгі тақырыптар мен нәтижелер:
- Бағдарлама клиникалық зерттеулердің соңғы нәтижелерін, заманауи ғылыми ізденістерді, сондай-ақ инсульттің алдын алу, емдеу және реабилитациялаудың үздік тәсілдерін қамтыды.
- Ерекше назар жаһандық ынтымақтастыққа, инсульт бойынша көмекке қолжетімділікті кеңейтуге, теңдік пен инклюзия қағидаттарын нығайтуға аударылды.
- «Инсульттен кейінгі өмір» (Life After Stroke) тақырыбындағы сессиялармен қатар, жас зерттеушілер мен клиницистерге арналған курстар мен шеберлік сабақтары ұйымдастырылды.
Айта кету керек, Қазақстан халықаралық клиникалық зерттеу OCEANIC-STROKE жобасына қатысты, оның нәтижелері осы конгресте халықаралық авторлар тобының атынан баяндалды. Бұл жобада ұлттық жетекші ретінде Сауле Тлеубергеновна болды.
Аталған конгресс инсультпен күрес бойынша халықаралық қауымдастықты біріктіріп, тәжірибе алмасуға және барлық елдерде инсульттен болатын өлім мен мүгедектікті азайтуға бағытталған жаңа шешімдер қабылдауға қуатты серпін берді. Ұйымдастырушылар инновацияларды пайдалану, ғылыми жетістіктерді тәжірибеге енгізу және медициналық көмектің сапасын ұлттық әрі жаһандық деңгейде арттырудың маңыздылығын ерекше атап өтті.
