БІЗ СІЗДЕРМЕН МАҚТАНАМЫЗ!
Жұмашев Уәлихан Қошқарәліұлы – медицина ғылымдарының докторы,профессор, жоғары санатты онколог-хирург дәрігер, сонымен қатар ауған соғысының ардагері. 1985-1987 жылдар аралығында Кеңес Әскерінде қызмет еткен азамат. Сол жылдары ауған соғысымен тұспа-тұс келіп Уалихан Қошқарәліұлы соғыс майданына аттанады. Кейіннен ауған соғысының ардагері ғылым жолына бет бұрып, қазақ медицинасының дамуына орасан зор үлес қосты.
1993 жылы Уәлихан Қошқарәліұлы еліміздің медициналық практикасына елеулі үлес қосып, алғаш рет «Балалар онкологиясы» мамандығын есепке алды. Бүгінде бұл мамандық 5-6 курс студенттеріне, сондай-ақ 6-7 курс интерндеріне арналған оқу бағдарламаларына енгізілген.
Ол 120-дан астам ғылыми жұмыс пен 2 монографияның, соның ішінде балалар онкологиясы бойынша алғашқы оқулықтың авторы болып табылады. Оның еңбектері екі тілде жазылған және медицина ғылымының дамуына қосқан маңызды үлесі болып табылады. Қазіргі таңда С. Д. Асфендияров атындағы Қазақ Ұлттық Медицина Университетінің Нұғманов атындағы «Онкология» кафедрасының профессоры дәрігерлік пен ұстаздық жолды қатар алып жүрген алтын азаматтың ерлігі мен еңбек жолы жас ұрпаққа тамаша үлгі. Біз сізбен мақтанамыз.
Батыр ұстазымызды 7 мамыр Отан қорғаушылар күні және 9 мамыр Ұлы Жеңіс күнімен шын жүректен құттықтаймыз!
6 мамыр күні резиденттермен кездесу ұйымдастырылып, кездесу барысында “Ұлттық медицина ассоциация”төрайымы Садыкова Айжан Бекайдаровна Жұмашев Уалихан Қошқаралыұлын “Гиппократ орденімен” марапаттады. Резидентура бойынша декан орынбасары Хабдин Құрмет Елубайұлы және медицина қызметінің подполковнигі Лесбаев Әлімхан Тазабекұлы – Жұмашев У.К. құттықтап, ізгі тілектерін білдіріп кеш қонақтары болды, С.Н.Нұғманов атындағы “Онкология” кафедрасының оқытушылары – м.ғ.д., профессор Төлеутайұлы Кәрібай, кафедра меңгерушісі Садыкова Толкын Таждиновна, кафедра оқытушылары, резиденттер осы кешті ұйымдастыруға ат салысты. Жумашев У.К. бастан өткерген қызықты әңгімелерімен бөлісіп, жас мамандарды шабыттандыра отырып, тәрбиелік мәні зор кездесу куәгері болдық.
Мыңдаған шәкіртке білім беріп жүрген еңбегіңіз әр кезде бағаланып, тек биіктерден көрініңіз! Сізге және отбасыңызға амандық, деніңізге саулық, бейбіт заман тілейміз!
Авторы: дәрігер-резидент онколог Нурмухамбет Аяулым, Бекәлі Айбек
