Дүниежүзілік денсаулық сақтау ұйымы Қазақстанның үздік тәжірибелерін басқа елдерге ұсынады

17.03.2023 | просмотров: 978

Дүниежүзілік денсаулық сақтау ұйымы Қазақстанның алғашқы медициналық-санитарлық көмек саласындағы үздік тәжірибелерін ұсынады. Бұл туралы Денсаулық сақтау министрі Ажар Ғиният ДДҰ Еуропалық өңірлік комитетінің Санжар Асфендияров атындағы Қазақ ұлттық медицина университетінде өткен отырысында мәлімдеді.

Ведомство басшысы атап өткендей, Қазақстан 1978 жылы Алматы Декларациясының қабылдануының арқасында бүкіл әлемге МСАК отаны болып танылды.

«МСАК бойынша медициналық қызметтердің көбісі қолжетімді болуы тиіс. Біз әлемде алғаш рет әлеуметтік және психологиялық қызметтерді көрсете бастадық, өйткені науқастар осы мәселелермен дәрігерлерге жиі жүгінеді. Көпсалалы бригадалар құрылды, барлық бөлімшелерде әлеуметтік қызметкерлер жұмыс істейді, бүкіл ел бойынша 3000-нан астам психолог тартылды. Бұл ДДҰ-ның үздік тәжірибелері енгізіліп жатқанын көрсетеді», – деді Ажар Ғиният.

Отбасылық дәрігерлер институтын енгізу тағы бір маңызды ұсыныс болып табылады. Мұндай мамандар науқастың отбасы, тұқым қуалайтын аурулар туралы толық мәліметтерге ие және жоғары сапалы қызмет көрсете алады.

«Бүгінде біз денсаулық сақтаудың барлық жүйесін халықтың қажеттіліктеріне бейімдеп жатырмыз. Психологиялық көмекпен, туберкулезбен ауыратын науқастармен емханалық байланыстар мұндай науқастарға әлеуметтік стигмасыз мамандарға баруға мүмкіндік берді. Қазіргі таңда ДДҰ көптеген елдерге біздің ең жақсы тәжірибелерімізді ұсынады», – деді министр.

Дүниежүзілік денсаулық сақтау ұйымының Еуропалық өңірлік комитетінің кеңесі Алматы қаласында 14-15 наурызда Қазақ ұлттық медицина университетінде өтті.

Талқыланатын мәселелердің арасында:

* 2023– 2028 жылдарға арналған медициналық-санитарлық және әлеуметтік қызметкерлерге қатысты іс-қимылдарға арналған ДДҰ-ның еуропалық негіздемесі

* ДДҰ-ның 2023-2030 жылдарға арналған еуропалық аймағындағы микробқа қарсы препараттарға тұрақтылықпен күрес бойынша Жол картасы

* ДДҰ Еуропалық аймағында Денсаулық сақтау саласындағы төтенше жағдайларға дайындықты, жауап шараларын қамтамасыз ету (2023-2030 жж.)

* ДДҰ-ның еуропалық аймақтардағы босқындар мен мигранттардың денсаулығына қатысты 2023-2030 жылдарға арналған іс-қимыл жоспары

Сондай-ақ, Кеңестің бағдарламасында – Қазақстандағы алғашқы медициналық-санитарлық көмек саласындағы жағдаймен танысу үшін №5 қалалық ауруханаға бару болды.

Дүниежүзілік денсаулық сақтау ұйымының Еуропалық өңірлік комитетінің өкілдері Қазақ ұлттық медицина университетінің студенттерімен жаттығу жасауға белсене қатысты.