Ерлік пен естеліктің ұлы мерекесі: ҚазҰМУ Отан қорғаушылар күні мен Ұлы Жеңістің 80 жылдығын атап өтті
С.Ж. Асфендияров атындағы Қазақ ұлттық медицина университетінде 7 мамыр — Отан қорғаушылар күні мен 9 мамыр — Ұлы Отан соғысындағы Жеңістің 80 жылдығына арналған ауқымды іс-шаралар өтті. Бұл қос мереке ҚазҰМУ үшін айрықша мәнге ие, себебі университет тарихы соғыс жылдарындағы студенттер, оқытушылар мен түлектердің ерлігімен тығыз байланысты. Мерекелік бағдарлама Мәншүк Мәметова мен Владимир Иваниловқа арналған «Даңқ аллеясындағы» ескерткішке гүл шоқтарын қоюмен басталды. Бұл аллеяда соғысқа қатысқан 248 студент пен оқытушының есімдері жазылған.
«Батырларға тағзым»: ұрпақ есінде мәңгі сақтайды
Мерекенің ерекше сәттерінің бірі – «Батырларға тағзым» шеруі болды. Студенттер мен оқытушылар майдангер-медиктердің, университет түлектері мен ұстаздарының портреттерін ұстап сап түзеп жүріп өтті. Қатысушылар ҚазҰМУ-дың даңқты түлектерімен қатар, өз отбасының майдангер ата-бабаларының да портреттерін көтеріп, ұрпақтар сабақтастығын және жадының қасиеттілігін паш етті.
Әскери-патриоттық орталық: идеядан нәтижеге дейін
Аталған күні ҚазҰМУ қабырғасында әскери-патриоттық тәрбие беру орталығы ашылды. Орталық болашақ дәрігерлердің азаматтық және кәсіби жауапкершілігін қалыптастыратын, әрі межесі — халықаралық деңгейдегі алаңға айналу. Қазақстан-Ресей медицина университетінің ректоры Нұрлан Темірбекұлы Жайнақбаевқа орталықты басқару ресми түрде ұсынылып, ол бұл ұсынысты зор мақтанышпен қабыл алды.
«Естелік – тарихты тірілтетін күш. Бұл орталық құрылымдық бөлімше ғана емес, студенттер, оқытушылар мен медицина мамандарының күш-жігерін біріктіретін алаң болады деп сенеміз, – деді ҚазҰМУ ректоры Марат Шоранов.
Мәншүк Мәметова аудиториясының жаңғыруы
Тың толғаныспен өткен сәттердің бірі — Кеңес Одағының Батыры, ҚазҰМУ студенті Маншүк Мәметова атындағы жаңартылған аудиторияның ашылуы болды. Аудитория 1930-жылдар стилінде қайта жөнделіп, тарихи атмосферасы қалпына келтірілді. Мерекеге батырдың немере туысы Мәметова Шолпан Қанатқызы қатысып, университет ұжымына естелікті сақтап келе жатқаны үшін алғысын білдірді.
«Мәншүк есімі — біздің мақтанышымыз. Бұл — рух мықтылығының, Отанға деген махаббат пен кәсіби адалдықтың нышаны. Оның ерлігі бүгінгі ұрпақты да шабыттандырады», – деді ректор Марат Шоранов.
Солдаттар ботқасы, концерт және марапат
Ресми бөлімнен кейін қатысушылар майдан рецептісімен әзірленген солдат ботқасынан дәм татып, студенттер, қызметкерлер және шақырылған әртістер қатысқан мерекелік концертті тамашалады. Сахнада соғыс жылдарының әндері мен Отан, бейбітшілік тақырыбындағы заманауи шығармалар шырқалды. Шара барысында марапаттар табысталып, қорғаныс ұйымдарымен бірлесе дайындалған әскери көрсетілімдер де ұйымдастырылды.
«Ақ халатты ерлік — майдандағы ерліктен кем емес. Біздің ардагерлер Отан мен кәсіпке деген сүйіспеншіліктің ажырамас екенін дәлелдеді. Олардың өнегесі — бізге ғылымда, оқуда, халыққа қызмет етуде бағыт болсын», – деп қорытындылады ректор Марат Шоранов.
ҚазҰМУ және Ұлы Жеңіс: ақ халатты батырлар
Соғыс басталған күннен-ақ ҚазММИ-дің 248 студенті мен оқытушысы майданға аттанды. Соғыс жылдары университет 2 000-нан астам дәрігер дайындады, олардың 75%-ы майдан шебіне жіберілген. ҚазҰМУ тарихында өшпес ерлік көрсеткен студенттер, түлектер мен ұстаздар:
Мәншүк Мәметова – 2-курс студенті, пулемётші, Кеңес Одағының Батыры. Невель түбіндегі шайқаста 70-тен астам жау сарбазын жойып, ерлікпен қаза тапты.
- Халида Маманова – 1941 жылғы түлек, майданда жазалау батальонында соғысты. Берлинге дейін жетіп, кейін профессор, медицина ғылымдарының докторы болды.
- Владимир Иванилов – студент-ерікті, Сталинград шайқасының қаһарманы, Польшада 23 жасында қаза тапты.
- Василий Зюзин – профессор, соғыс жылдары ҚазММИ ректоры, №3990 эвакогоспитальді басқарған, хирургия саласына зор үлес қосты.
- Виктор Зикеев – аты аңызға айналған хирург, госпитальдық хирургия кафедрасының негізін қалаушы.
- Брякин Михаил Иванович – хирург, соғыс ардагері, кейінгі жылдары ҚазММИ-де ұстаздық етті.
- Карынбаев Еркінбек Жұмабекұлы – соғыс жылдарының түлегі, майдангер-дәрігер, жүздеген адамды аман алып қалды.
- Мұрзагалиев Сапарғали – соғысқа қатысқан хирург, әскери-медициналық қызметтің дамуына үлес қосты.
- Гладышев Пётр Иванович – терапия кафедрасының оқытушысы, соғыс кезінде госпиталь бастығы, орден иегері.
- Александров Николай Тимофеевич – анатомия кафедрасының меңгерушісі, медициналық қызмет капитаны.
- Терещенко Мария Ивановна – эвакогоспитальдерде еңбек еткен ұстаз, соғыстан кейін де оқу процесін жалғастырды.
- Нигметжанова Рабиға – әскери терапевт-дәрігер, кейін ҚазҰМУ-дың құрылымдық бөлімшесінің жетекшісі болды.
- Шәріпов Абдулхамид – Курск шайқасына қатысқан хирург, кейінгі жылдары студенттерге тәлім берген.
Көпшілігі соғыстан кейін Alma-mater қабырғасына оралып, ғылым мен білімге үлес қосқан, жас ұрпаққа жол сілтеген тұлғаларға айналды. Олардың өмір жолы, ерлігі мен Ұлы Жеңіске қосқан үлесі — ҚазҰМУ-дың рухани мұрасының өзегі.
