Квадроцикл ер адамның жамбас сүйегін зақымдады: ҚазҰМУ дәрігерлері бірегей ота жасады
Қанат Тезекбаев – Қазақстандағы жамбас жарақаттарымен айналысатын санаулы мамандардың бірі. Санжар Асфендияров атындағы Қазақ ұлттық медицина университетінің травматология және ортопедия кафедрасының меңгерушісінің 40 жылдан астам дәрігерлік тәжірибесі бар, әрі ол үнемі ең күрделі клиникалық жағдайлармен бетпе-бет келеді. Бұл мақалада осындай жағдайлардың бірі туралы айтамыз.
Қалай болды
2024 жылдың 8 мамырында №4 қалалық ауруханаға жамбас сүйегінің сынығымен 33 жастағы ер адам түсті. Ол демалыс күндерін тауда достарымен квадроцикл теуіп өткізген. Биік өрлеулердің бірінде ер адам квадроциклді басқара алмай қалған. Нәтижесінде, квадроцикл аударылып қалды.
Ауыр көлік ер адамның ішінің төменгі бөлігін басып қалған. Кейінірек ауруханада дәрігерлер келесі жарақаттарды анықтайды:
- жамбас сүйегінің сынуы
- жамбас буындарының жарылуы
- сегізкөз аймағының бөлшектеніп сынуы
- сегізкөз аймағы сынықтары жүйке тамырларын жартылай зақымдаған, сондықтан науқас операцияға дейін сол аяқта жансыздану сезінген
- жамбас сүйегінің жалпы ығысуы
Жанында болған достары дер кезінде әрекет етті. Олар науқасқа тегіс жер даярлап, жедел жәрдем бөліміне хабарласқан. Біраз уақыттан кейін санитарлық авиацияның тікұшағы келіп, науқасты Бурундай станциясына жеткізді. Сол жерден жедел жәрдем бригадасы оны 4-ші қалалық клиникалық ауруханаға жеткізді.
Жамбас сүйектерінің сынуы қалай емделді?
Ауруханада науқасты кезекші бригада тексерді. Рентген, жамбас сүйектерінің компьютерлік томографиясы, іш қуысы ағзалары мен өкпесінің УДЗ жасалды. Нәтижесінде жоғарыда аталған жарақаттар анықталды.
Ең алдымен шокқа қарсы терапия жасалды. Содан кейін дәрігерлер жамбас сүйегін қозғалмау және қан кетудің алдын алу, ауырсынуды азайту мақсатында сыртқы фиксация аппаратын орнатты.
Операция бірден жасалған жоқ. Дұрыс емдеу тактикасын таңдау үшін клиникалық талқылау жүргізу қажет болды. Қанат Тезекбаев ҚазҰМУ травматология және ортопедия кафедрасының және №4 қалалық клиникалық ауруханасының қызметкерлерімен бірге барлық нұсқаларды зерттеп, операция жасау қажеттілігі туралы шешім қабылдады.
Туыстарымен келіскеннен кейін, 2024 жылдың 14 мамырында Қанат Тезекбаев емдеуші дәрігер Балдырған Алпысбаев пен бөлім меңгерушісі Дәурен Тусуповтың көмегімен бірегей аз инвазивті операция жасады. Емдеу кезінде алдыңғы қолжетімділік арқылы жамбас сүйегі мен сегізкөз сүйегі жиналып, бекітетін пластина қойылды. Дәрігерлер сүйек сынықтарын алып тастап, жамбас сүйегінің ығысуын жойды.
«Жақында ғана мұндай операциялар Қазақстанда жүргізілмейтін. Аталған отаның бірегейлігі оның аз инвазивтілігінде және сүйек сынықтары пластинамен бекітілгенінде (болашақта сынудың бітуі үшін остеосинтез жасалды). Бұрын мұндай науқастар мүгедектік алатын, әдетте 4-8 ай ауруханада жатып, содан кейін бір жыл мүгедектік берілетін. Ал біздің науқас өз бетінше жүріп-тұрады және 2 ай ішінде жұмысқа шыға алады», – деп бөлісті Қанат Тезекбаев.
Қалай травматолог болуға болады
Маманның айтуынша, ҚазҰМУ резиденттері 2-3 курстан бастап жамбас сүйектерінің сынықтарын емдеуге арналған күрделі операцияларға жүйелі түрде қатысады. ҚазҰМУ травматология және ортопедия кафедрасының қызметкерлері студенттерге бірегей тәжірибені жеткізу мақсатында күрделі жағдайларды жүйелі түрде талдап, сынықтарды емдеуге қатысады.
Дәрігерлік тексерулерден бөлек, резиденттер сыртқы фиксация аппараттарын орнатуды үйреніп, науқастарды емдеудің алғашқы кезеңдеріне және оңалтуға қатысады.
