«Коронавирус індетіне шалдыққан әрбір бесінші науқас психикалық бұзылуларға ұшыраған» – Нұрғожин Талғат
Санжар Асфендияров атындағы Қазақ ұлттық медицина университетінің базасында қазанның 13-15 аралығында «Ментальды денсаулық және COVID-19» атты ауқымды халықаралық ғылыми-тәжірибелік конференция өтуде. Конференцияға Қазақстан, Ресей, Түркия, Өзбекстан, Қырғызстан, Әзірбайжан, Тәжікстан, Болгария, Польша және Литва елдерінің психиатрия және психология саласындағы үздік мамандары қатысты.
Конференцияның негізгі сессиясын ҚР Денсаулық сақтау вице-министрі Гиният Ажар ашты. Ол Қазақстандықтардың психологиялық денсаулығына коронавирустың әсерінің маңызы және жедел шешімді талап ететінін алға тартты.
«Көптеген адамдар кез келгенді тығырыққа тірейтін мазасыздық, депрессия және соншалықты күшті апатиямен бетпе-бет келді. Бүкіл әлемнің адамдарына миллиондаған өлім-жітім, экономиканың құлдырауы, әлеуметтік өзара қарым-қатынасқа шектеулер қою әсер етпеуі мүмкін емес. Ғалымдардың жүргізген зерттеулері депрессияның, суицидтік ойлардың, алкоголь мен психоактивті заттарды пайдаланудың көбеюін көрсетеді. Қазіргі туындаған жағдай планетаның көптеген тұрғындары үшін қиын сынақ болды. Пандемияның дамуының бірінші кезеңінде басты мәселе ғылымға белгісіз коронавирустың таралуын тоқтату және одан науқастарды құтқару болды. Бірақ карантин мен оқшаулау шараларын енгізу барысында адамдардың эмоционалды жағдайы да нашарлайтыны белгілі болды. Ментальды денсаулық коронавирустық пандемиямен күресуде үлкен рөл атқарады», – деп атап өтті Ажар Гиният.
ҚазҰМУ ректоры Нұрғожин Талғат Сейітжанұлы халықаралық конференцияның қатысушыларына арнаған сөзінде психологиялық ауруларды емдеудің жаңа тәсілдерін іздестірудің маңыздылығын атап өтті. Профессор Нұрғожиннің айтуынша, коронавирус індетіне шалдыққан әрбір бесінші науқас психикалық бұзылуларға ұшыраған.
«Коронавирустық инфекцияның пандемиясы біздің күнделікті өміріміздің барлық салаларына әсерін тигізді. Оқшаулау, жақын адамдарын жоғалту, белгісіздік және оған деген қорқыныш – мұның барлығы психикалық аурудың даму қаупінің факторларына айналды немесе бұрыннан бар бұзылуларды күшейтіп жіберді: әрбір бесінші науқас COVID-19 диагнозынан кейін үш ай ішінде психикалық бұзылуларға тап болды. Осыған байланысты ментальды денсаулық мәселелеріне, психиатрия, психология, нейрофизиология және басқа да аралас ғылымдар саласындағы проблемаларға арналған конференция өткізу ерекше өзектілікке ие болып отыр», — деп атап өтті ҚазҰМУ ректоры.
Халықаралық ғылыми-тәжірибелік конференцияға қатысушыларға «ҚазҰМУ құрметті профессоры» атағы, сондай-ақ Санжар Асфендияров атындағы медальдар табысталды.
