«Медицина шын мәнінде барлық өнердің ең мәртебесі»
Табиғи дарын, ізгілікті ізденіс пен ерен еңбекке ұштастырыла білген ғалым-офтальмолог, қоғам қайраткері, профессор, Қазақстанның еңбек сіңірген дәрігері Жанар Ғабиденқызы Мустафинамен кездесу кеші Даңқ залында өтті. Кездесуге «Стоматология» және «Педиатрия» мектептерінің студенттері қатысты. Жанар Ғабиденқызы жас пен кәріге, жанын қоярға жер таптырмай азаптаған ауруынан айықтырып, ақ халатты періштедей көз алдында көлбеңдей жүріп, ертелі-кеш ерінбей, ел үшін еңбек етіп, халықтың алғыс-сауабын арқалаған ақ халатты абзал жан. Жанар Ғабиденқызы студенттерге өзінің еңбек жолы туралы, өз басынан өткерген қызықты оқиғалар мен ауыртпашылықтарын әңгімеледі. Студенттердің қойған сұрақтарына жауап берді. Сонымен қатар алдын ала дайындалған Мустафина Ж.Ғ. туралы видео-роликтер көрсетілді. Студенттер де өз өнерлерін ортаға салды. Ұрпаққа айтар ақылы, көрсетер өнегесі бар, аналық сезімнің, дана ойдың ыстық лебі бар аға ұрпақ өкілі ретінде Жанар Ғабиденқызы жастарға өз батасын және ақыл кеңестерін айтты. Студенттер кездесуден үлкен әсер алды. Кездесуді «Биофизика курсымен информатика» кафедрасы, «Стоматология» және «Педиатрия» мектептері және Жастар саясаты басқармасы ұйымдастырды.
