«Невада – Семей» Халықаралық антиядролық қозғалысының І жастар конференциясы
2017 жылдың 26 мамыр күні Қазақстан Республикасының Ұлттық кітапханасында белгілі ақын, қоғам қайраткері Олжас Сүлейменовтің қатысуымен «Невада – Семей» Халықаралық антиядролық қозғалысының І жастар конференциясы өтті. Невада-Семей, ядролық жарылысқа қарсы халықаралық қозғалыс – танымал қоғам қайраткері Олжас Сүлейменовпен құрылған қоғамдық-саяси ұйым. 1989 жылы 28 ақпанда құрылып, қазан айында ресми тіркелді. Республика халқынан кеңінен қолдау тапқан қозғалыс ядролық жарылыстарға қарсылық білдіріп, әлемдегі ядролық қауіпті жоюды мақсат етті, Семей ядролық полигонында ядролық сынақтарды тоқтатуға қол жеткізді. Қазақстанның көптеген қалалары мен аймақтарында, сондай-ақ Ресей, АҚШ, Италия,Жапония, Түркия, т.б. елдерде ұйымның бөлімшелері құрылған. Қозғалыстың белсенді қызметінің арқасында БҰҰ 53-сессиясы “Қазақстандағы Семей өңірі адамдары денсаулығы мен экологиясын сауықтыру және экономикасын дамыту мақсатындағы халықаралық ынтымақтастық пен іс-қимылды үйлестіру” қарарын қабылдады.
«Невада – Семей» қозғалысы әлемде ең алғаш рет жаңа моделді – халықтық және парламеттік дипломатияларының өзара жұмысын қолданып жетістікке жетті. Қазақстанға АҚШ (Невада штатынан) делегациясы келіп, бүкіл әлемде ядролық сынақтарды тоқтатуға шақырып, бейбіт шерумен өтті. Нәтижесінде бұл қозғалыс халықаралық атауға ие болды.
Олжас Сүлейменов Қазақстан табиғатының жандануы мен сақталуындағы ««Невада – Семей» Халықаралық антиядролық қозғалысы жастарының міндеті туралы» баяндама жасады.
Аталған конференцияға Ректор Кеңесшісі, профессор Мустафина Жанар Ғабиденовна, Х.Досмұхамедов атындағы қоғамдық денсаулық сақтау, медициналық-профилактикалық іс, мейіргер ісі және менеджмент факультетінің тәрбие ісі жөніндегі декан орынбасары А.С.Уважанова, және Экономикалық теория курсының оқытушысы Л.Т. Шайхина, мейіргер ісі мамандығының 2 курс студенттері қатысты. Мейіргер ісі мамандығының студенті Иманбек Бағымжан ядролық қаруға жастардың қарсы екендігін айтып Невада-Семей қозғалысына арнап өлең оқыды. Студенттер бұл конференциядан үлкен әсер алды.
