Патриоттық рух-басты құндылық
Университетте 2017 жылы 13 қараша күні жастар арасында патриоттық сезімдерді ұялату мақсатында Алматы қаласының ішкі саясат басқармасының тапсырысы негізінде «Керекті жақтау» әлеуметтік және шығармашылық бастамаларының қоры» Қоғамдық қорының студенттерге арналған «Патриоттық рух – басты құндылық» жобасы бойынша Қазақстан Республикасы Білім және ғылым министрлігі Ғылым комитетінің Ш. Ш. Уәлиханов атындағы Тарих және этнология институтының жетекші ғылыми қызметкері, тарих ғылымдарының кандидаты Әуезхан Шашаевтың «Тәуелсіздігіміздің тарихи белестері» тақырыбында танымдық дәрісі өткізілді.
Іс-шараға «Қазақстан тарихы және әлеуметтік-гуманитарлық пәндер» кафедрасының оқытушылары Г. Рсалдина, С.Жолдыбаева, Г.Турсынбекова, З.Нагайбаеваның ұйымдастыруымен Жоғары медицина, стоматология, фармация мектептерінің ЖМ17-010, ЖМ17-015, СТ17-011, Ф17-002 академиялық топтарының 80-нен аса 1 курс студенттері дәрісті тыңдауға қатысты.
Дәрістің спикері, желтоқсан оқиғасының куәгері Ә. Шашаев, қазіргі таңдағы қазақстандық патриотизмнің басты мақсаты – қоғамдық келісімді, бірлігіміз бен ынтымағымызды аса қымбат құндылықтар ретінде сақтау және нығайту және оның негізгі іргесі – барша азаматтардың, ұлттардың және этностардың теңдігі мен олардың Отан алдындағы өз борышын сезінуі мен жауаптылығында екенін, режиссер Қ. Әбеновтың «Аллажар» фильмінен көріністер көрсетіп, мысалдар келтіріп, қызғылықты түрде айтып өтті.
Тәрбие жұмысы және әлеуметтік қолдау бөлімінің бас маманы Р. Жармағанбет, «Қазақстан тарихы және әлеуметтік-гуманитарлық пәндер» кафедрасының доценті Г. Рсалдина, қоғамдық қордың үйлестірушісі Н. Береза өз ойларымен бөлісіп, алғыстарын білдірді.
Студенттердің патриоттық сенімдерін қалыптастырып, белсенді өмірлік бағытын, көзқарасын ұстануда ой салатын дәріс болып өтті.
Жастар саясаты басқармасы
