«Санжар Асфендияров” қойылымы Конкордияда
«Конкордия» студенттік театрында университетіміздің негізін қалаушысының 136 жылдығына арналған «Санжар Асфендияров» драмасы сахналанды. Тарихи дәлдікке құрылған көрініс, актерлердің шынайы ойыны мен әсерлі атмосфера кешті ерекше етті. Көрермен ду қол шапалақтап, «браво!» деп ризашылық білдірді.
Асфендияров есімі – ҚазҰМУ мен тұтас ел үшін сапалы медициналық білімге жол ашқан, ғылыми адалдық пен адамға қызмет ету мәдениетінің үлгісі. Оның идеялары бүгін де біздің кодымыздың бір бөлігі болып қала береді: терең білім, дәлелді медицина, пациент пен қоғам алдындағы жауапкершілікті қабылдау. ҚазҰМУ өз іс-шараларын құрметтеп, сабақтастық пен құндылықты жаңа буынға жеткізуді басты қағида етеді.
Кештің құрметті қонақтары: ҚР Мемлекет және қоғам қайраткері, ҚР Мемлекеттік сыйлығының лауреаты, заң ғылымдарының докторы, профессор, ҚР ҰҒА академигі Мұхтар Құл-Мұхаммед; режиссер, сценарист, драматург, Қазақстанның Халық әртісі Ерсайын Төлеубай; сценарист Сержан Зәкерұлы; Қазақстанның Халық әртісі, Қазақстан Жастар одағы сыйлығының лауреаты Дулыға Ақмолда.
«Бүгін Конкордия сахнасында біз Санжар Асфендияровтың идеялары студенттеріміздің жеке таңдауы болып отырғанын көрдік: адал білім алу, кәсіби емдеу, адамдарға қызмет ету. Бұл – ұрпақтар сабақтастығының айқын көрінісі», – деп атап өтті ҚазҰМУ ректоры Марат Шоранов.
Кеш университеттің студенттері мен оқытушыларын біріктірді. Санжар Асфендияровтың өмір жолы жеке мотивацияға айналып, спектакль кәсіби дамуға бағыт көрсетті. ҚазҰМУ ғылым, өнер және тәрбиенің тоғысында жатқан жобаларды қолдауды жалғастырады. Өйткені дәл осылай болашақ дәрігердің мінезі қалыптасады: тамырын таниды, құндылығын сақтайды және адамдар үшін еңбек етуге дайын болады.
