С.Ж. Асфендияров атындағы ҚазҰМУ-дың неврология және қолданбалы нейроғылымдар ғылыми-білім беру орталығының жетекшісі Аида Муратқызы Кондыбаева «Ерен еңбегі үшін» медалімен марапатталды
2025 жылғы 10 сәуірде Астанадағы Ақорда резиденциясында Қазақстан Республикасының Президенті Қасым-Жомарт Кемелұлы Тоқаевтың қатысуымен еліміздің алдыңғы қатарлы ғалымдарын марапаттау рәсімі өтті. Ғылым қызметкерлері күніне орайластырылған салтанатты іс-шара еліміздің ғылыми қауымдастығының көрнекті өкілдерін бір арнаға тоғыстырды.
Мемлекет басшысы өз сөзінде қазақстандық ғалымдардың елдің ғылыми әлеуетін дамытуға қосқан үлесін жоғары бағалап, ғылымның тұрақты экономикалық өсім, технологиялық тәуелсіздік пен қоғамдық ілгерілеуді қамтамасыз етудегі шешуші рөлін атап өтті. Сонымен қатар Президент жас зерттеушілерді қолдау, ғылыми инфрақұрылымды дамыту және ғылым, университеттер мен өндіріс арасындағы байланысты нығайту қажеттігін ерекше атап өтті.
Салтанатты рәсім аясында С.Ж. Асфендияров атындағы Қазақ ұлттық медицина университетінің неврология және қолданбалы нейроғылымдар ғылыми-білім беру орталығының жетекшісі, PhD докторы Аида Муратқызы Кондыбаева мемлекеттік марапат – «Ерен еңбегі үшін» медалімен марапатталды. Бұл марапат қолданбалы нейроғылымды дамытуға, ғылыми әдістерді клиникалық практикаға енгізуге және жоғары білікті мамандар даярлауға қосқан елеулі үлесі үшін берілді.
Аида Муратқызының жетекшілігімен орталық неврология саласындағы іргелі зерттеулерді, пәнаралық жобаларды және инновациялық технологияларды медициналық практикамен табысты үйлестіретін еліміздегі маңызды ғылыми-білім беру алаңдарының біріне айналуда.
С.Ж. Асфендияров атындағы Қазақ ұлттық медицина университетінің ұжымы Аида Муратқызын мемлекеттік деңгейдегі лайықты марапатымен шын жүректен құттықтай отырып, оның кәсіби біліктілігіне, ғылыми табандылығына және университет ғылымын дамытуға қосқан баға жетпес үлесіне зор алғыс білдіреді.
