Хирург Смағұлов Әлібек Мұхамеджанұлымен кездесу «Біз берілген сынақтардан шыңдаламыз»
Дипломнан кейін білім беру факультеті және Резиденттер кеңесінің ұйымдастырумен ҚазҰМУ-дің Қазақстан Республикасының 31 жылдығына арналған іс-шаралар аясында Тәуелсіздік жылдарында медицина саласында жетістікке жеткен қазақстандық дәрігерлердің жетістіктерін дәріптеу жобасы бойынша Алматы қаласындағы ШЖҚ «Балалар шұғыл медициналық көмек орталығы» МКК-ның бас дәрігері, 2017 жылы ұйыдастырылған «Қазақстандық 100 жаңа тұлға» жобасының жеңімпазы, хирург Смағұлов Әлібек Мұхамеджанұлымен кездесу өткізді. Кездесуге корпоративтік даму бойынша проректор У.М.Датхаев, клиникалық жұмыстар бойынша проректор С.Е.Сұлтанғазиева, балалар хирургиясы кафедрасының профессоры, балалар хирургиясының майталманы Қ.Т.Тұрсынов қатысты. Сонымен қатар хирургиялық бейінді резидентура мамандықтары бойынша білім алушылар және кафедра оқытушылары қатысты. Кешті жүргізуші факультет деканы А.Н.Баймаханов кеш қонағының өмірбаянына туралы тоқталып өтті. «Әлібек Мұхамеджанұлы 1988 жылы Алматы облысы Есік қаласының №2 орта мектебін бітірді. Сол жылы Қарағанды мемлекеттік медицина институтының «Емдеу ісі» факультетіне түсіп, 1994 жылы дәрігер дипломын алды. Еңбек жолын 1994 жылы Алматы қаласындағы ОҚКБ шұғыл хирургия қабылдау бөлмесінде хирург дәрігер болып бастаған. 2004 жылға дейін хирургиялық инфекциялар бөлімшесінің меңгерушісі, 1-ші хирургиялық бөлімшенің меңгерушісі болды. 2004 -2006жж. аралығында Алматы қаласы Қалалық онкологиялық диспансерінің емдеу бөлімі бойынша бас дәрігердің орынбасары қызметін атқарды. 2006 жылдан 2008 жылға дейін ШҚО Өскемен қаласында денсаулық сақтау бөлімінің емдеу жұмысы бойынша бас маманы лауазымында жұмыс істеді. 2008 жылдан бастап №4 ҚКА қабылдау бөлімшесінің хирург дәрігері болып қызмет атқарды. 2011 жылдан бастап №4 ҚКА хирургия бөлімшесінің меңгерушісі қызметін атқарды. 2018 жылдан бастап Алматы қаласындағы №4 ҚКА бас дәрігерінің хирургия жөніндегі орынбасары болып тағайындалды. Қазіргі уақытта Алматы қаласының «Балалар шұғыл медициналық көмек орталығы» бас дәрігері болып қызмет атқарып жүр. 1998-2001 жылдары «Тұран» университетінде «Құқықтану» мамандығы бойынша заңгерлік білім алған. 2010 жылы Алматы қаласындағы «Денсаулық сақтау менеджменті» мамандығы бойынша магистратураны бітірген. 2013 жылы Алматы қаласындағы ҚДСЖМ (ВШОЗ) докторантурасында оқыды. 2019 жылы «CBS» Мәскеу бизнес мектебін бітіріп, МВА «Іскерлік әкімшілендіру шебері» дәрежесімен диплом алды. Әлібек Мұхамеджанұлы көптеген адамдарға ота жасаған, оның ішінде жүректен пышақ жарақатын алып, өлім мен өмір үстінде жатқан 14 адамның 11-і оның кәсіби біліктілігімен көп жылдық тәжірибесінің арқасында өмірге қайта оралды».
Әлібек Мұхамеджанұлы педагогиканың негізін қалаушылардың бірі – Ян Амос Каменскийдің «Сіз өз біліміңізге жаңа ештеңе қосқан жоқпын және жаңа ештеңе үйренген жоқпын деген күнді – ең бақытсыз күн деп санаңыз» деген сөзімен бастады.
Әдетте, мен бала кезімнен дәрігер болуды армандадым, немесе атақты хирургтерге еліктедім деген сөзді күткен тыңдаушыларды, «мен хирургияға кездейсоқ келдім деген» сөзі бір таңқалдырып тастады. «Оташы хирургтың жұмысы өте ауыр, сондықтан өмір бойы үйрену, іздену, оқу керек, ғылыми әдебиетті оқи отыра, өздеріңіз де ой түйіп, соны тәжірибемен ұштастырыңыз. Маған кейде өмірі қыл үстінде жатқан науқастың жанын алып қалу үшін күрескен хирургтер қасқағым сәт жаратушымен байланыста болатын секілді болып көрінеді. Мен өз мамандығымнан қатар екінші мамандықты, заңгерлікті оқыдым, дәрігер мамандығы адам өмірімен байланысты болғандықтан өлім-жітім де болып жатады, қолыңыздан келгеннің бәрін жасасаңыз да, адам жанын арашалап қала алмайтын жағдайлар болады. Сондай жағдайларда өзімді заң жүзінде қорғау үшін осы мамандықты игеруге тура келді. Жалпы бір-ақ қана бақытсыздық бар – ол сыналу (сынақ), бірақ бұның өзі бақытқа апаратын жол, себебі біз, осы берілген сынақ арқылы шыңдаламыз» деп сөзін тәмәмдады.
Әлібек Мұхамеджанұлы кездесуге қатысушы резиденттердің сұрақтарына жауап берді.
Бұдан кейін кеш қонағы туралы «Хабар» арнасы түсірген деректі фильм көрсетілді. Фильмдегі кейіпкеріміздің өмірі және отбасы туралы түсірілген эпизодтар білім алушыларға қатты әсер етті.
Кеш өте қызықты өтті. Кешке қатысушы болашақ дәрігерлерге Әлібек Мұхамеджанұлы үлкен әсер қалдырды.
