«Цифрлық трансформация дәуіріндегі пәнаралық неврология: мәселелер және инновациялық шешімдер» атты халықаралық қатысумен өткен II Республикалық ғылыми-тәжірибелік конференция
2026 жылғы 9–10 сәуірде Астана қаласында цифрлық медицина жағдайындағы неврология трансформациясына арналған II Республикалық ғылыми-тәжірибелік конференция еліміздің жетекші неврологтарын, ғалымдары мен клиницистерін біріктірді. Ауқымды ғылыми іс-шараны «Астана медицина университеті» КеАҚ және «Денсаулық» неврологтар мен нейрооңалтушылар қоғамы» ҚБ, АМУ неврология кафедрасының меңгерушісі Л.Е. Есжанованың жетекшілігімен ұйымдастырды.
Конференция денсаулық сақтау саласындағы жаһандық сын-қатерлерге жауап ретінде кәсіби қоғамдастықтың шоғырлану нүктесіне айналды. Басты назарда — цифрлық технологияларды енгізу: диагностикадағы жасанды интеллект, үлкен деректерді талдау (Big Data), пациенттерді бақылаудың цифрлық платформалары және дербестендірілген медицинаны дамыту.
С.Д. Асфендияров атындағы ҚазҰМУ жүйке аурулары кафедрасы ғылыми бағдарламаға елеулі үлес қосып, заманауи халықаралық трендтерді көрсететін негізгі баяндамаларды ұсынды:
- Кафедра меңгерушісі С.Т. Тұрысбекова — «Миастения гравис: терапияның заманауи стратегиялары»;
- Профессор Е.С. Нургужаев — «Таммырлық когнитивті жеткіліксіздік: ерте араласу тактикасы»;
- Профессор Ж.Р. Идрисова — «Қазақстан Республикасындағы 1-типті нейрофиброматозы бар пациенттерді диагностикалау мен жүргізудің негізгі аспектілері»;
- Қауымдастырылған профессор К.К. Альмаханова — «Шашыранды склероз кезіндегі В-жасушалық терапия: субоптимальды жауабы бар пациенттерде тері астындағы анти-CD20 стратегиясының орны».
Ұсынылған зерттеулер отандық неврология мектебінің жоғары деңгейін және оның нысаналы (таргетті) және иммуномодуляциялық терапияны қоса алғанда, озық әлемдік тәсілдерді біріктіруге дайындығын көрсетті.
Конференцияның практикалық бағытын жүйке жүйесінің ең күрделі әрі әлеуметтік маңызды салаларына — аутоиммундық және орфандық (сирек) ауруларға арналған мамандандырылған шеберлік сыныптары күшейтті.
Нейрооптикомиелит спектрінің аурулары және миастения гравис бойынша шеберлік сыныбы халықаралық деңгейдегі сарапшыларды біріктірді:
- Профессор Д.С. Касаткин (ЯММУ халықаралық байланыстар жөніндегі проректоры, Ярославль қ.);
- Н.А. Ефставьева (Аутоиммундық аурулар орталығының жетекшісі, Қарағанды қ.).
Сарапшылар диагностиканың, иммунологиялық стратификацияның және таргетті терапияның заманауи тәсілдерін ұсынып, созылмалы аутоиммундық аурулардың барысын бақылаудағы цифрлық құралдардың рөлін атап өтті.
Бөлек шеберлік сыныбы жұлын бұлшықет атрофиясына (SMA) арналды, онда ерте анықтау, неонатальды скрининг және инновациялық терапияның қолжетімділігі мәселелері талқыланды:
- Ю.Е. Мартынова (Морозов атындағы БҚКА, Мәскеу қ.);
- Л.А. Текебаева (ҚР ДСМ бас балалар неврологы, «UMC» КҚ, Астана қ.).
Сарапшылар талқылауына ҚР ДСМ бас штаттан тыс ересектер неврологы С.Т. Тұрысбекова қатысты, бұл орфандық аурулары бар пациенттерді емдеуде балалар мен ересектер неврологиясы арасындағы сабақтастықтың маңыздылығын айқындады.
«Невролог шеберлігі: гиперкинетикалық бұзылыстарды тану және емдеу» шеберлік сыныбы неврологтардың клиникалық ойлауын және практикалық дағдыларын дамытуға бағытталды:
- Доцент Г.К. Тайтубаева (АМУ оңалту және спорттық медицина кафедрасы, Астана);
- Р.С. Таутанова (Астана).
Сондай-ақ, өзекті «XXI ғасырдағы ұйқының бұзылуы: халықаралық консенсус және практикалық шешімдер» атты шеберлік сыныбын доцент А.С. Қасенова (АМУ ЖОО-дан кейінгі білім беру институтының директоры, Астана) өткізді.
Конференция қорытындысы бойынша қатысушылар цифрлық шешімдерді клиникалық практикаға жеделдетіп енгізу, пәнаралық өзара іс-қимылды дамыту және пациенттердің диагностика мен емдеудің инновациялық әдістеріне қолжетімділігін кеңейту қажеттігін атап өтті.
Астанада өткен бұл конференция Қазақстанның неврология саласындағы аймақтық сараптама орталығы ретіндегі мәртебесін растап, медицинаны жаһандық цифрлық трансформациялаудағы белсенді рөлін айқындады.
