Қазақстанда 2024–2026 жылдарға арналған су үнемдеу жөніндегі жол картасы аясындағы жұмыстар жалғасуда
Қазақстанда 2024–2026 жылдарға арналған су үнемдеу жөніндегі жол картасы аясында су ресурстарын тиімді пайдалану және халық арасында суды үнемдеудің маңыздылығын арттыру бағытындағы жұмыстар белсенді түрде жүргізілуде. Атап айтқанда, 5.1 және 4.2.3 тармақтары бойынша нақты іс-шаралар қолға алынған.
5.1 тармағы шеңберінде ауыл шаруашылығы мен коммуналдық салада су үнемдейтін технологиялар кезең-кезеңімен енгізілуде. Атап айтқанда, тамшылатып және жаңбырлатып суару әдістері кеңінен қолданылып, суару жүйелері жаңартылуда. Сонымен қатар, су шығынын нақты есептеуге мүмкіндік беретін есептегіш құралдар орнатылып, цифрлық мониторинг жүйелері енгізілуде.
Ал 4.2.3 тармағына сәйкес, халық арасында суды үнемдеу мәдениетін қалыптастыру мақсатында кең көлемді ақпараттық-түсіндіру жұмыстары жүргізілуде. Бұқаралық ақпарат құралдары мен әлеуметтік желілер арқылы ақпарат тарату, мектептер мен жоғары оқу орындарында экологиялық сабақтар мен кездесулер өткізу жолға қойылған. Сонымен қатар, суды үнемдеудің маңыздылығын насихаттайтын бейнероликтер, брошюралар мен инфографика таратылуда.
Аталған шаралар су тұтыну көлемін азайтуға, сондай-ақ халықтың су ресурстарына деген жауапкершілігін арттыруға бағытталған. Жол картасының іс-шаралары жергілікті атқарушы органдармен, қоғамдық ұйымдармен және сарапшылармен тығыз ынтымақтастықта жүзеге асырылып жатыр.
