ҚазҰМУ-да академик Бақия Атшабаров атындағы ІҚМ ҒЗИ-дың жаңартылған корпусы ашылды
Ғылым қызметкерлері күні қарсаңында С.Ж. Асфендияров атындағы ҚазҰМУ-да академик Бақия Атшабаров атындағы Іргелі және қолданбалы медицина ғылыми-зерттеу институтының модернизациядан өткен корпусының салтанатты ашылуы өтті.
Бұл шара тек ғимаратты қайта құру жұмыстарының аяқталуын ғана емес, университеттің ғылыми және білім беру ортасын дамытудың жаңа кезеңінің басталуын білдіреді.
Б. Атшабаров атындағы ІҚМ ҒЗИ — ҚазҰМУ-дың ғылыми экожүйесінің негізгі. Мұнда қолданбалы нейроғылым, халық денсаулығына төнетін қауіптерді бағалау, фармация және клинико-эксперименталдық медицина салаларындағы перспективалы зерттеулер жүзеге асырылуда. Жаңартылған корпуста заманауи зертханалар орналасқан. Оның ішінде ең жоғары деңгейдегі ғылыми жобаларды іске асыруға арналған озық технологиялармен жабдықталған ортақ пайдаланымдағы ғылыми орталық бар.
Институт қызметінің басты бағыттарының бірі — жас ғалымдарды қолдау, олардың зерттеу құзыреттерін дамыту және халықаралық ғылыми ынтымақтастыққа белсенді тарту. Ашылу салтанатында ҚазҰМУ ректоры Марат Шоранов өз сөзінде былай атап өтті:
«Бүгін біз тек ғимараттың есігін ашып тұрған жоқпыз – біз мүмкіндіктер кеңістігін ашып отырмыз. Бұл кеңістік – идеялар жаңалыққа айналатын, ал батыл ғылыми тұжырымдар адам өмірін сақтайтын шешімдерге ұласатын орта. ҚазҰМУ ғылыми инфрақұрылымды дамытуға және жоғары деңгейдегі зерттеулерге жағдай жасауға бағытталған жұмысын жүйелі түрде жалғастыра береді».
Корпустың ашылуы ҚазҰМУ-дың стратегиялық мақсатына қарай жасалған тағы бір маңызды қадам болды. Бұл алдыңғы қатарлы ғылыми базаны қалыптастыру және университеттің Орталық Азиядағы жетекші медициналық жоғары оқу орындарының бірі ретіндегі орнын нығайтуға бағытталған бастама.
Институт академик Бақия Атшабаровтың есімін иеленген. Ол – Қазақстандағы медицинаның және ғылымның дамуына зор үлес қосқан көрнекті ғалым, білікті дәрігер әрі мемлекет қайраткері. Институтқа есімінің берілуі – ұрпақтар сабақтастығының символы және болашақ зерттеушілер үшін бағыт-бағдар.
Академик Б.А. Атшабаров атындағы ІҚМ ҒЗИ-дың жаңартылған корпусының ашылуы — ғылыми көшбасшылыққа, технологиялық ілгерілеуге және халықаралық мойындалуға бағытталған университет тарихындағы жаңа кезеңнің бастауы.
