ҚазҰМУ-да «Таланттылар сайысы-2018» байқауы өтті

Үстіміздегі 2018 жылдың 25 сәуір күні «Concordia» театрында Ж.Асфендияров атындағы Қазақ Ұлттық медицина университетінің жылдағы қалыптасқан дәстүрі бойынша және Елбасы Н.Ә.Назарбаевтың «Болашаққа бағдар:Рухани жаңғыру» мақаласы аясында, сондай-ақ Еліміздің Бас қаласы -Астана қаласының 20 жылдық мерейтойына арналған мектептер мен факультеттің өнерпаз студенттерінің қатысуымен «Таланттылар сайысы-2018» байқауы өткізілді. Аталған «Таланттылар сайысының» ұйымдастыру жұмысына Жастар саясаты басқармасы, Мәдени шығармашылық жобаларды іске асыру тобы, деканаттар, студенттік деканаттар, кураторлар біріге атсалысты. Байқау 6 номинация түрлерін қамтыды. Атап айтқанда: Ұлттық аспаптар ансамблі, Астана, туған жер туралы патриоттық әндер, әлем халықтарының билері, заманауи би, ұлттық нақыштарды қолдана отырып дайындаған қыздардың жаздық көйлектер топтамасы, топтық орындаудағы ретро әндер номинациялары болды.
Бүгінгі күні оқу орнымызда 17 шет мемлекеттен келген студенттер білім алуда. Соның ішінде байқауға бар ынтасымен Үндістан, Иордания мемлекеттерінен келген Халықаралық медицина факультетінің студенттері белсене қатысып, өз өнерлерін ортаға салды. Сондай-ақ, Жалпы медицина, Стоматология, Фармация, Қоғамдық денсаулық сақтау мектептерінің студенттері қатысты. Байқауда 130- дан аса студенттер бақ сынасты. Әр халықтың билері мен әндері орындалып, кәсіби өнер ұжымдарынан арнайы әділқазылар алқасы шақырылды. Сән үлгісі бойынша қыздар дайындаған көйлектер көрермендер мен әділқазыларға өте қатты ұнады. Жас дизайнерлер жаздық топтаманы өздері пішіп, ою-өрнектермен көмкеріп, қолмен тігіп дайындаған. Аса көп қаржы жұмсамай-ақ әдемі көйлек жасап шығаруға болатынын көрсетті. Жалпы байқау өте тартысты өтті. Барлық факультеттердің студенттері бар ынта-жігермен дайындалғандықтарын көрсете білді. Мектептер арасында ұпай саны көптігі жағынан Жалпы медицина мектебі болды. Жалпы медицина мектебімен ұпай саны жағынан қатарлас болған Халықаралық медицина факультетін айрықша атап өтуге болады. Байқауда әділқазылар алқасының шешімі бойынша Жалпы медицина факультеті «Ең үздік өнер көрсеткен», ал Халықаралық медицина факультеті «Талантты факультет» номинацияларын бөлісті. Байқауға ҚазҰМУ білім алушылар кәсіподақ ұйымы қаржылай жағынан демеушілік көмегін көрсетті. Мереке соңында байқау жеңімпаздары мен қатысушыларына дипломдар, алғыс хаттар, сыйлықтар табысталды.