ҚазҰМУ-да Халықаралық факультет интерндеріне диплом табысталды
Санжар Асфендияров атындағы Қазақ ұлттық медицина университетінде Халықаралық факультет интернатурасының түлектеріне диплом табыстау рәсімі өтті. Биыл бұл факультетті 43 интерн аяқтап шықты. Олардың 36-сы — Қазақстан азаматтары, ал 7-еуі — Үндістаннан келген шетелдік студенттер.
Екі түлек үздік дипломмен марапатталса, бір жас маман «Үздік түлек – 2025» атағына ие болды. Тағы 8 интернге «Үздік түлек – 2025. Халықаралық факультет» номинациясы берілді.
“Сіздер енді тек дәрігер ғана емес, ҚазҰМУ-дың атын әлемге танытатын елшісіздер. Қайда барсаңыздар да, қандай ортада қызмет етсеңіздер де, сіздердің әрбір іс-әрекеттеріңіз, әрбір табыстарыңыз университетіміздің абыройына қосылған үлес болмақ. Бұл сіздердің қолдарыңыздағы дипломмен бірге жүретін үлкен жауапкершілік”, – деді өз сөзінде университет проректоры Светлана Султангазиева.
ҚазҰМУ — Қазақстандағы ең ірі халықаралық студенттер қауымдастығына ие медициналық жоғары оқу орны. Бүгінде мұнда 36 елден келген үш мыңға жуық студент білім алуда. Оларға 85 жеке білім беру бағдарламасы, сондай-ақ отандық және шетелдік жетекші университеттермен бірлескен 5 қос дипломды және 5 интеграцияланған оқу бағдарламасы ұсынылған. ҚазҰМУ бүгінде әлемнің 26 еліндегі 92 жоғары оқу орнымен берік әріптестік байланыс орнатқан.
Биыл ҚазҰМУ еліміздің медициналық элитасын даярлау ісіндегі 95 жылдық мерейтойын атап өтуде. Университеттің халықаралық және ұлттық рейтингтердегі жоғары көрсеткіштері — оның еліміздегі жетекші медициналық жоғары оқу орны ретіндегі мәртебесін айқындайды.
QS Asia өңірлік рейтингінде ҚазҰМУ Азия университеттері арасынан топ-350 қатарына енсе, Webometrics мәліметі бойынша еліміздің үздік 5 жоғары оқу орнының қатарында. Сонымен қатар университеттің цифрлық көрсеткіштері жыл сайын өсіп келеді.
«Атамекен» 2025 жылғы білім беру бағдарламалары ұлттық рейтингінде ҚазҰМУ «Медицина», «Стоматология», «Мейіргер ісі» және «Фармацевтикалық өндіріс технологиясы» бағыттары бойынша бірінші орындарды иеленді.
Ad Scientific Index мәліметі бойынша, ҚазҰМУ ғылыми жарияланымдар мен дәйексөздер көрсеткіші бойынша Қазақстанда — 5-орында, Азияда — 1417-орында, ал әлем бойынша ең үздік 4000 университеттің қатарына кіреді.
