ҚазҰМУ-да Ғылым күніне орай «Атчабаров оқулары» өтті
С.Ж. Асфендияров атындағы Қазақ ұлттық медицина университетінде Ғылым күніне орай «Атчабаров оқулары» атты студенттер мен жас ғалымдардың ғылыми-тәжірибелік конференциясы өтті. Іс-шара Қазақстан мен Қырғызстаннан келген жас зерттеушілерді біріктіріп, заманауи медицина мен денсаулық сақтау саласының өзекті бағыттарын талқылауға арналған алаңға айналды.
Конференцияға Алматы, Астана, Ақтөбе, Қарағанды, Семей, Өскемен, Шымкент және Бішкек қалаларынан барлығы 78 өтінім келіп түсті. Қатысушылар қатарында 17-ден 37 жасқа дейінгі бакалаврлар, интерндер, резиденттер, магистранттар, докторанттар және жас ғалымдар болды. Өтінімдер қазақ, орыс және ағылшын тілдерінде ұсынылды.
Қатысушылар ең көп қызығушылық танытқан бағыттар қатарында клиникалық медицина және дәлелді зерттеулер, денсаулық сақтаудағы цифрлық технологиялар мен жасанды интеллект, қоғамдық денсаулық және эпидемиология, трансляциялық және персоналдандырылған медицина, сондай-ақ іргелі биомедицина болды. Іріктеу қорытындысы бойынша бағдарламаға 20 ғылыми жұмыс енгізілді.
Баяндамалармен С.Ж. Асфендияров атындағы ҚазҰМУ, Семей медицина университеті, Педиатрия және балалар хирургиясы ғылыми орталығы, И.К. Ахунбаев атындағы Қырғыз мемлекеттік медицина академиясы, University Medical Center, Қазақ онкология және радиология ғылыми-зерттеу институты, Қазақстан-Ресей медицина университеті және «ҚДСЖМ» Қазақстан медицина университетінің өкілдері сөз сөйледі.
Қазылар алқасы академиялық және медициналық қауымдастық өкілдерінің қатысуымен баяндамаларды бағалады. Талқылау нәтижесінде ұсынылған зерттеулердің өзектілігі, баяндамалардың жоғары дайындық деңгейі және ғылыми жұмыстардың практикалық маңыздылығы атап өтілді.
Конференцияның жүлде қоры 300 мың теңгені құрады, оны проректор Ильдар Фахрадиев тағайындады.
Жеңімпаздар ретінде үш қатысушы анықталып, олардың әрқайсысына сертификат және 100 мың теңге көлемінде ақшалай сыйақы табысталды.
Үздіктер қатарында ҚазҰМУ-дың 1 курс резиденті Айғаным Байгутанова (балалардағы Ходжкин лимфомасы терапиясының уыттылық құрылымы туралы баяндама), ҚазҰМУ акушерия және гинекология кафедрасының ассистент-профессоры Дильфуза Сұлтанмуратова (босануды индукциялаудан кейін кесар тілігінің қаупін болжау бойынша зерттеу) және ҚазҰМУ-дың 6 курс интерні Сымбат Құлдасова (Орталық Азия популяциясындағы экссудативті емес жасқа байланысты макулярлық дегенерация кезінде субфовеальды хориоидальды қалыңдықтың ерекшеліктері туралы баяндама) бар.
