ҚазҰМУ мен SDU университеттерінің бірлескен бағдарламасы: SDU-да «Денсаулық сақтаудағы менеджмент» MBA және EMBA магистранттарға диплом табысталды
SDU университетінде С.Асфендияров атындағы Қазақ ұлттық медицина университетімен бірлесе іске асырылатын «Денсаулық сақтаудағы менеджмент» MBA және EMBA магистрлік бағдарламаларының түлектеріне диплом тапсыру салтанатты рәсімі өтті.
2022 жылы іске қосылған бұл бірлескен бағдарлама Денсаулық сақтау саласындағы басқарушылық білім беруді дамытудағы маңызды қадам болып саналады. Оның бірегейлігі – түлектер SDU және ҚазҰМУ-дың қос дипломын алады. Бұл мамандардың болашағына жаңа мансаптық перспективалар мен халықаралық мүмкіндік береді.
Бағдарлама іске қосылған сәттен бастап 51 жоғары білікті маман даярланды, ал биыл тағы 11 магистрант қолына диплом алды. Оның ішінде 5 MBA бағдарламасы бойынша және 6 EMBA бағдарламасы бойынша оқуды аяқтады. Түлектер арасында Денсаулық сақтау басқармаларының, медициналық ұйымдардың, санитарлық-эпидемиологиялық сараптама орталықтарының басшылары, сондай-ақ ҚазҰМУ қызметкерлері бар.
SDU университетімен бірлескен білім беру бағдарламасы: халықаралық стандарттар мен тәжірибеге бағытталған тәсілдің үйлесімі
Бағдарлама шеңберінде оқыту медициналық менеджмент саласындағы жетекші сарапшылардың басшылығымен өтеді. SDU University оқытушылары халықаралық стандарттарға сәйкес дайындықтың жоғары деңгейін қамтамасыз ете отырып, бағдарламаның дамуына айтарлықтай үлес қосады. Оқытудың заманауи әдістемелері, Денсаулық сақтау менеджменті мен экономикасы саласындағы терең сараптама магистранттарға қазіргі заманғы денсаулық сақтау жүйесінде талап етілетін өзекті білім мен практикалық дағдыларды алуға мүмкіндік береді.
Халықаралық тағылымдамалар: медициналық менеджмент саласындағы үздік әлемдік тәжірибелер
Бірлескен бағдарламаның басты артықшылығының бірі – Түркия мен Кореяның жетекші медициналық ұйымдарында тағылымдамадан өту мүмкіндігі. Оқыту барысында магистранттар денсаулық сақтауды басқарудың инновациялық тәсілдерін зерделейді. Бұл алған білімді Қазақстанда қолдануға және елдің медицина саласының дамуына ықпал етуге мүмкіндік береді.
ҚазҰМУ қызметкерлерінің кәсіби дамуын қолдау
Бағдарлама жалпы денсаулық сақтау мамандарын дамытуға ғана емес, ҚазҰМУ қызметкерлерінің біліктілігін арттыруға да бағытталған. Олар үшін оқытуға арнайы жеңілдіктер қарастырылған. Бұл денсаулық сақтау жүйесінің кадрлық әлеуетіне инвестициялардың стратегиялық маңыздылығын растайды.
Түлектер үшін жаңа мүмкіндіктер
SDU University және ҚазҰМУ бірлескен бағдарламасы бойынша магистратура дипломы – бұл жоғары біліктілікті растау ғана емес, сонымен қатар Қазақстанда және шетелде кәсіби өсу мүмкіндігі. Түлектер заманауи медициналық мекемелерді тиімді басқару және денсаулық сақтау жүйесіне инновациялық шешімдерді енгізу үшін қажетті білім мен құзыреттерге ие.
SDU University және С.Асфендияров атындағы Қазақ ұлттық медицина университеті заманауи медицинаның сын-тегеуріндеріне жауап бере алатын басқарушылардың жаңа буынын қалыптастыра отырып, «Денсаулық сақтаудағы менеджмент» MBA және EMBA бағдарламасын іске асыруды жалғастыруда.
