ҚазҰМУ ректоры Марат Шоранов ТашММИ-де кәсіби көшбасшылық және денсаулық сақтау саласындағы басқару тақырыбында дәріс оқыды
Өзбекстанда өтіп жатқан Қазақстан медицинасы күндері аясында С. Ж. Асфендияров атындағы ҚазҰМУ-дың ректоры Марат Шоранов Ташкент мемлекеттік медицина институтының магистранттары мен оқытушыларымен кездесті.
Дәрістің негізгі мазмұны кәсіби көшбасшылық, медициналық басқару және жаңа буын мамандарын даярлау тақырыптарына арналды. Марат Шоранов көшбасшы мен менеджердің айырмашылығын түсіндіріп, медицина саласында тиімді басқарудың түрлі стильдері мен тәсілдері туралы айтты. Сондай-ақ басшының сенімді шешім қабылдай білуі мен кең көзқарасқа ие болуының маңызын атап өтті.
Ректор ҚазҰМУ тәжірибесінен нақты мысалдар келтіріп, университеттегі көшбасшылық қағидаттарының күнделікті жұмыс барысында қалай жүзеге асатынын көрсетті: цифрлық шешімдерді дамыту, Ғылыми-технологиялық парктің қызметі, жас ғалымдар мен оқытушыларды қолдау бағытындағы жұмыстар.
Студенттер заманауи басқару тәсілдері, командамен өзара әрекеттесу және медициналық білім беру жүйесіндегі көшбасшылықтың рөлі туралы сұрақтар қойды.
