ҚазҰМУ Әз-Наурыз мерекесін ауқымды атап өтті
С.Ж. Асфендияров атындағы Қазақ ұлттық медицина университеті Әз-Наурыз мерекесін кең көлемде атап өтті.
Мерекелік бағдарламада театрландырылған шеру, концерт, халықтық салт-дәстүрлер мен әдет-ғұрыптардың көрсетілімі, ұлттық тағамдар мен спорттық ойындар, марапаттау рәсімдері, сондай-ақ «Университет Аруы – 2025» және «Университет Барысы – 2025» байқаулары мен этнофестиваль болды.
Табиғаттың жаңа өмірлік кезеңінің басталуын білдіретін бұл күндері университет дәстүрлі түрде жетістіктерін қорытындылап, жаңа белестерге бет алады.
«Биылғы Наурызды біз маңызды жетістіктермен және үлкен жоспарлармен қарсы алып отырмыз. Бұл — бүкіл ұжымның жүйелі еңбегі мен серіктестеріміздің және түлектеріміздің қолдауының нәтижесі. Жетістіктеріміз тек рейтингтер мен көрсеткіштер ғана емес, олардың артында ұлт саулығына деген қамқорлық, студенттердің болашағына салынған инвестиция және қоғамның сенімі жатыр. Біз жаңа аудиториялар мен жатақханалар ашып, клиникаларымызды жаңғыртып, профессор-оқытушылар құрамын күшейтіп келеміз. Мұның бәрі әрбір студент университетін мақтанышпен таңдап, болашағына сенімді болу үшін жасалуда. ҚазҰМУ алдағы уақытта да жаңашылдықтарды енгізіп, дәстүрге адалдықты сақтай отырып алға жылжи береді», — деді ҚазҰМУ ректоры Марат Шоранов.
Биыл университет көктемді үлкен жетістіктермен қарсы алып отыр:
- ҚазҰМУ медициналық жоғары оқу орындарының ұлттық және халықаралық рейтингтерінде көш бастап тұр. 2025 жылдың наурыз айында университет QS World University Rankings by Subject рейтингіне енді. 2024 жылы QS ұйымы ҚазҰМУ-ды QS WUR 2025 әлемдік рейтингісінде топ-1500 қатарына енгені үшін арнайы сертификатпен марапаттады. Сонымен қатар ҚазҰМУ — Қазақстан Жоғары оқу орындарының сұранысының тәуелсіз рейтингінің жеңімпазы. Университет бакалавриаттың «Денсаулық сақтау және әлеуметтік қамсыздандыру (Медицина)» білім беру бағдарламалары бойынша институционалдық рейтингте 1-орын алды. ҚазҰМУ — QS Asia University Rankings 2025 рейтингінде ұсынылған 13 қазақстандық жоғары оқу орнының бірі.
- Жаңартылған Тест орталығы ашылды. Ауқымды жаңартудан кейін бұл орталық студенттердің білімін әділ әрі заманауи бағалауға арналған платформаға айналды.
- Б.Атшабаров атындағы іргелі және қолданбалы медицина ғылыми-зерттеу институты жаңартылды.
- Кафедраларға күрделі жөндеу жүргізіліп, заманауи құрал-жабдықтармен жабдықталды. Оқу базасы кеңейтіліп, жаңа аудиториялар пайдалануға берілді. Стоматология мектебінде цифрлық кабинет ашылды.
- Материалдық-техникалық база нығайтылып, жайлы білім беру ортасы құрылды. Оқу процесін автоматтандыру, тәртіпті арттыру және қатысымдылықты бақылау мақсатында ауқымды цифрландыру жұмыстары жүргізілді.
- Университеттің цифрлық экожүйесі дамып келеді.
- Ғылыми ұжымдар халықаралық деңгейде зор жетістіктерге қол жеткізуде.
- Университеттік клиникалар сәтті дамып келеді. Онда күрделі операциялар жасалып, басқа мекемелерде қолжетімсіз медициналық қызметтер көрсетілуде. «Қазақстан халқына» қорымен бірлесіп ірі медициналық жобалар жүзеге асырылуда.
ҚазҰМУ-дағы Наурыз — тек көктемнің келуі ғана емес, жаңа мүмкіндіктер мен жетістіктердің бастамасы!
