ҚазҰМУ 2022 жылдың үздік түлектері марапатталды
«Concordia» театрында өткен Түлектер күні аясында Санжар Асфендияров атындағы Қазақ ұлттық медицина университетінің үздік түлектері «ҮЗДІК ТҮЛЕК-2022» – «ҚазҰМУ 2022 үздік түлегі» төсбелгісімен марапатталды. Медальдарды «Ер азамат денсаулығы» қоғамдық бірлестігінің төрағасы, медицина ғылымдарының докторы, профессор Шалекенов Болат Уахитұлы табыс етті.
«Баршаңызды ҚазҰМУ түлектері күнімен құттықтаймын. Барлық ұстаздарыма зор денсаулық, белсенділік, әрдайым өмірлік айқын ұстаным тілеймін. Мен осында қатысып отырған, ұстаздарымды құттықтап өткім келеді. Менің ең басты ұстаздарым Жарбусынов Бейнеш Уразұлы және оның серіктері Девятко Василий Николаевич мен Каюпова Нина Амировна болды. Ең бастысы, Нина Амировна айтқандай, халаттарымыз ақ, абыройымыз кіршіксіз таза болсын», – деді ол.
«ҚазҰМУ 2022 үздік түлегі» төсбелгілерін жалпы медицина мектебінің түлегі Исмаилов Шахмұрат, халықаралық факультет түлегі Қадырова Айнұр, педиатрия мектебінің түлегі Ибатдолда Назгүл, денсаулық сақтау мектебінің түлегі Аблимитова Феруза алды. Сондай-ақ медбикелік іс мектебінің түлегі Гайдарқызы Балнұр, стоматология мектебінің түлегі Жамашев Жеңіс, фармацевтика мектебінің түлегі Рахманқұлова Мейірім, фармацевтикалық өндіріс технологиясы Өмірова Камилла, жалпы медицина факультетінің интерндері Жұмағазы Дана, Лисовенко Ольга, Жартау Салтанат, стоматология Серікбаева Айжан, хирургия кафедрасының ординаторы Аскеев Бағлан, педиатрия дәрігері Абдримова Шахниза, анестезиология және реаниматология кафедрасының ординаторы Ахметов Досымжан, Дүниежүзілік денсаулық сақтау және қоғамдық денсаулық сақтау магистрі Егеубаев Талант, докторант Абуова Жанар медальдармен марапатталды.
Биыл Қазақ ұлттық медицина университетін 1840 бакалавр мен интерн, 577 резидент, 91 магистр және 51 докторант тәмамдап отыр.
Түлектер күнін мерекелеу аясында ҚазҰМУ салтанатты түрде гала-концерт, түлектер шеруі, «ҚазҰМУ үздік түлегі 2022», «ҚазҰМУ мақтанышы» номинацияларының жеңімпаздарын марапаттау рәсімі, ҚазҰМУ жас талантты студенттерінің жұмыстарының аукционы өтті. Түлектер шеруіне университеттің ең танымал түлектері қатысты. Сондай-ақ, мереке кампус аумағында жалғасын тапты, түлектер алдында қазақстандық эстрада әртістері, университеттің талантты студенттері мен оркестр өнер көрсетті.
Биыл университеттің шаңырағының астында өткен жылдар мен биылғы 2022 жылдың барлық факультеттерінің түлектері кездесті. «ҚазҰМУ Түлектер күні» жобасы алғаш рет жүзеге асырылуда және ұрпақтар сабақтастығын мақсат тұтады.
