ҚазҰМУ QS World University Ranking марапатын алды
Санжар Асфендияров атындағы Қазақ ұлттық медицина университетінің ректоры Марат Шоранов Quacquarelli Symonds ұйымдастырған салтанатты іс-шараға қатысты. Онда қазақстандық жетекші жоғары оқу орындарының өкілдері QS World University Ranking 2023 қатысушыларының сертификаттарымен марапатталды.
Санжар Асфендияров атындағы Қазақ ұлттық медицина университеті 2462 әлемдік ЖОО арасында 651-700 позициясын иеленді. ҚазҰМУ бұл элиталық рейтингтің құрамына екінші жыл қатарынан қатысып келеді. Бұл рейтинг бүкіл әлемдегі университеттердің ең көп қаралым бойынша рейтингі болып табылады, Academic Ranking of World Universities және Times Higher Education World University Rankings қатар әлемдегі ең көп қаралатын және беделді үш рейтингтің бірі болып саналады.
«Қазақстандық әріптестерімізді құттықтағымыз келеді. Әл-Фараби атындағы Қазақ ұлттық университеті, Л.Н. Гумилев атындағы Еуразия ұлттық университеті және М. Әуезов атындағы Оңтүстік Қазақстан Университеті сынды университеттеріміздің QS World University Ranking қатысуы қазақстандық білім беру саласының беделінің өскенін, біздің университеттеріміздің білім беру қызметтерінің әлемдік нарықта бәсекеге қабілетті екенін көрсетеді», – деді өз сөзінде Марат Шоранов.
«ҚазҰМУ мақсатты моделі мультидисциплинарлық білім беруге, зерттеулер мен әзірлемелерді практикалық денсаулық сақтауға енгізуге баса назар аудара отырып, оның әлемдік деңгейдегі университетке айналуын ынталандырады. Біз тек дәрігерлерді ғана дайындап қоймай, бүкіл әлемдегі адамдар үшін ең қымбат – олардың денсаулығы үшін барлығын құрбан етуге дайын ақ халатты абзал жандарды дайындаймыз. Тектілік, мейірімділік және жанашырлық — білім беру мен медицина мамандарын даярлауға негізделген құндылықтар. Әрине, бұл рейтингке қатысу дұрыс жолда екенімізді тағы да растады, өйткені бұл оқу орнымыздың дамуының тағы бір кезеңі, даңғыл жолдағы кезекті кезең», – деп толықтырды сөзін ол.
Сондай-ақ Марат Шоранов өзінің әріптесі, Қазақ ұлттық аграрлық университетінің ректоры Тілектес Исабайұлы Есполовты мерейтойымен құттықтап, жоғары оқу орнының сіңірген еңбегі мен жоғары деңгейдегі жетістіктерін атап өтті.
