Неврологиялық аурулар қоғамдық денсаулық сақтаудың басымдығы ретінде: Қазақстанда ЖІЖІП-тің (IGAP) іске асырылуын жеделдету
2026 жылғы 9–12 маусым аралығында Астанада Дүниежүзілік денсаулық сақтау ұйымының (ДДҰ) қолдауымен Эпилепсиямен және басқа да неврологиялық бұзылыстармен күрес жөніндегі сектораралық жаһандық іс-қимыл жоспарын (IGAP 2022–2031) іске асыруға арналған іс-шаралар сериясы өтті. Кездесулер неврологиялық аурулары бар пациенттерді профилактикалау, диагностикалау, емдеу және оңалтудың өзекті мәселелерін талқылау үшін ДДҰ, Еуропалық аймақ елдерінің денсаулық сақтау министрліктерінің, ғылыми қоғамдастықтың, кәсіби қауымдастықтардың және пациенттер ұйымдарының өкілдерін біріктірді. Іс-шараларға С.Ж. Асфендияров атындағы ҚазҰМУ жүйке аурулары кафедрасының қызметкерлері белсенді қатысты.
ДДҰ-ның ұлттық семинары: Қазақстанда IGAP-ты іске асыруды жеделдету
9–10 маусымда Қазақстанда неврологиялық қызметті дамыту мәселелеріне арналған ДДҰ-ның ұлттық семинары өтті. Көмек көрсету бағыттарын, дәрі-дәрмекпен қамтамасыз етуді, кадрлар даярлауды, ғылыми зерттеулерді жетілдіру және денсаулық сақтау саласына цифрлық шешімдерді енгізу басты назарда болды. Сарапшылық сессиялар аясында С.Ж. Асфендияров атындағы ҚазҰМУ жүйке аурулары кафедрасының қауымдастырылған профессорлары Роза Балтабаевна Нуржанова мен Радмила Тимсоновна Цой мамандарды даярлау және неврологиялық көмекті ұйымдастыру саласындағы Қазақстанның жетістіктерін таныстырды. Профессорлар дәрі-дәрмекпен қамтамасыз ету және диагностикалық мүмкіндіктерді дамыту мәселелері бойынша баяндама жасап, халықаралық серіктестермен бірлесіп жүргізіліп жатқан когнитивті денсаулық пен деменция саласындағы зерттеулердің нәтижелерін ұсынды.
ДДҰ-ның елдер аралық оқу семинары
11–12 маусымда Астанада аймақтың тоғыз елінің: Армения, Беларусь, Қазақстан, Қырғызстан, Молдова, Ресей, Тәжікстан, Түркіменстан және Өзбекстан өкілдерінің қатысуымен «Неврологиялық аурулар қоғамдық денсаулық сақтаудың басымдығы ретінде: ДДҰ-ның Еуропалық аймағында IGAP-ты іске асыруды жеделдету» атты ДДҰ-ның елдер аралық оқу семинары өтті. Қазақстандық делегацияны ҚР Денсаулық сақтау министрлігі Медициналық көмекті ұйымдастыру департаментінің директоры Гүлнар Еділқызы Сәрсенбаева, Салидат Қайырбекова атындағы Ұлттық денсаулық сақтауды дамыту ғылыми орталығының өкілі Наталья Георгиевна Юницина, С.Ж. Асфендияров атындағы ҚазҰМУ жүйке аурулары кафедрасының меңгерушісі, ересектердің бас штаттан тыс неврологы Сауле Тлеубергеновна Туруспекова, Эпилепсияға қарсы Қазақстан лигасының төрайымы Ләйлә Орылғазықызы Дайырбаева, ҚР Денсаулық сақтау министрлігінің балалардың бас штаттан тыс неврологы Латина Айтжанқызы Текебаева таныстырды.
Семинар барысында Қазақстанда IGAP-ты енгізудің жол картасын әзірлеу, нормативтік-құқықтық базаны жетілдіру, диагностикаға, емдеуге және дәрі-дәрмекпен қамтамасыз етуге қолжетімділікті кеңейту, алғашқы буын мамандарын даярлау, Неврологиялық аурулардың ұлттық тіркелімін құру және ғылыми зерттеулерді дамыту мәселелері талқыланды. Елдер арасында тәжірибе алмасуға, сектораралық өзара іс-қимылды нығайтуға және ұлттық пен аймақтық деңгейде IGAP-ты іске асырудың тұрақты тетіктерін қалыптастыруға ерекше назар аударылды. Бұл іс-шаралардың Қазақстанда өткізілуі халықаралық ынтымақтастықты дамытудағы маңызды қадам болып табылады және ДДҰ-ның Еуропалық аймағында неврологиялық аурулардың алдын алу мен емдеудің заманауи тәсілдерін ілгерілетудегі елдің белсенді рөлін айғақтайды.
