«Танымал тұлғалармен кездесу» бағдарламасы аясында студенттер Т.Ә.Ізмұхамбетовпен кездесті

14.11.2016 | просмотров: 7  056

2016 жылдың 11 қарашасында С.Ж.Асфендияров атындағы ҚазҰМУ-дың «Даңқ Залында» «Танымал тұлғалармен кездесу» бағдарламасы аясында, Қазақстан Республикасы Тәуелсіздігінің 25-жылдығына орай дәрігер, педагог, ғалым Ізмұхамбетов Талапқали Әбішұлымен кездесу өтті.

Т.Ә.Ізмұхамбетов оташы дәрігер мамандығынан бастап, денсаулық сақтау министрі қызметінде болып үлкен өмір мектебінен өткен азамат. Ел денсаулығын ойлауда «Халық денсаулығын сақтау туралы» ҚР алғашқы заңнамасын дайындаушы және «Темекі түтінінен азат Алматы» бағдарламасының бірінші бастамашысы болып Дүниежүзілік денсаулық сақтау ұйымының жоғары бағасын алған. Темекіге қарсы бағдарламасын елімізде жүргізуде Поляк республикасы денсаулық сақтау қорының алтын наградасын иеленген.

Кездесуде ҚР еңбек сіңірген қызметкері Талапқали Әбішұлы «Ауырып ем іздегенше, ауырмайтын жол ізде» тақырыбында өз ойын ортаға салды. Әр адамның салауатты өмір салтын ұстанып, дұрыс тамақтанып өз денсаулығына үнемі көңіл бөліп отыруы керектігін баса айтты. Тағлымы мол шара студенттердің де қызығушылығын тудырып, қонаққа тақырып төңірегінде көптеген сұрақтар қойылды.