Philosophy of Groove — 2016 Брейк-данс бойынша Қазақстанның кезекті ашық чемпионатының қорытындысы
2016 жылдың 18 қарашасында ҚазҰМУ-дың «Concordia» театрында Қазақстанның Брейк данс бойынша жыл сайынғы екінші дүркін ашық чемпионаты өтті. Іс-шараның ұйымдастырушылары Студенттермен жұмыс жөніндегі басқармасы және Қоғамдық денсаулық сақтау, медициналық-профилактикалық, мейірбике ісі және менеджмент факультетінің 5 курс студенті Тимур Рахматулин. Чемпионат демеушілері ретінде: «RED BULL» сауда маркасы, «GAME OVER» көше киімдері дүкені, «FITNESS MIX» би студиясы болды.
Чемпионатты өткізудегі негізгі мақсат жастар арасында салауатты өмір салтын насихаттау, олардың шығармашылыққа, әсіресе би мәдениетіне деген қызығушылықтарын арттыру. Сонымен бірге белсенді әрі салауатты демалысқа қалыпты жағдай жасау, көше мәдениетіннің позитивтік көріністерін қоғамға көрсету және де ең бастысы – үздік бишілерді анықтау.
Чемпионатқа жас санатына сәйкес, 5 жастан жоғары Қазақстан Республикасының және өзге көрші елдерден, атап айтқанда Өзбекстан, Қырғызстан мемлекеттерінің болашағынан үміт күттірер бірегей бишілері қатысты. Сайысқа қатысушылар өздерінің би өнерінің хас шеберлері екенін айқын көрсетті.
Кәсіби бишілер номинациясын Алматы қаласының бишілері, университетіміздің 5 курс студенттері Рахматуллин Тимур және Есалиев Айбол жеңіп алды. Балалар номинациясын Тараз қаласынан келген 12 жастағы Шестоков Андрей иеленді.
Біз өз кезегімізде Брейк дансқа қатысушыларға шығармашылық табыс және жаңа белестерге жетуіне тілектеспіз. Келесі жылы жаңа серпін, жаңа идея, жаңа бимен қуантады деген үміттеміз!
