Алматыда Төрегелді Шармановтың халықаралық сыйлығы тапсырылды
АЛМАТЫ. ҚазАқпарат – Медициналық-санитарлық көмекті дамытуға үлес қосқан шетелдік дәрігерлер, сондай-ақ COVID-19 диагностикасы мен емдеу хаттамасын әзірлеуші отандық инфекционистер Төрегелді Шармановтың халықаралық сыйлығына ие болды, деп хабарлайды ҚазАқпарат тілшісі.
2021 жылғы 16 ақпанда Қазақстанда Төрегелді Шармановтың халықаралық қоры құрылды, оның қызметі денсаулыққа қатысты жалпыға бірдей құқық идеясын дамытуға бағытталған. Қор қызметі аясында Шармановтың халықаралық сыйлығының лауреаттарына марапаттар салтанатты түрде табыс етілді. Алқалы марапатқа алғашқы медициналық-санитарлық көмекті дамытуға қосқан үлесі үшін Джонс Хопкинс университетінің шетелдік ғалымдары Дэвид Бишай мен Майк Шлайф, сондай-ақ қазақстандық дәрігерлер, COVID-19 диагностикасы мен емдеу хаттамасын әзірлеуші инфекционистер – Бақыт Көшерова мен Амангүл Дүйсенова ие болды. Шара барысында Алматы әкімі Бақытжан Сағынтаев профессор Төрегелді Шармановты туған күнімен құттықтап, оның отандық денсаулық сақтау жүйесінің қалыптасуы мен дамуына қосқан зор үлесін атап өтті.
Төрегелді Шармановтың халықаралық қорының миссиясы – денсаулық сақтау және дұрыс тамақтану саласындағы жас және болашағы зор ғалымдардың жобаларын қолдау. Бұдан басқа, қор диетологиямен айналысатын әлемдік академиялық орталықтарда мамандардың тағылымдамасына гранттар беру жоспарда бар. Төрегелді Шарманов – еліміздегі медицинаның ірі ұйымдастырушыларының бірі, Қазақстан мен Орталық Азия республикаларындағы нутрициологтар мектебінің негізін қалаушы. Ол 1978 жылы Алматыда Дүниежүзілік денсаулық сақтау ұйымы мен ЮНИСЕФ қамқорлығымен алғашқы медициналық-санитарлық көмек жөніндегі халықаралық конференцияны өткізудің бастамашысы ретінде әлемдік және қазақстандық денсаулық сақтауға зор үлес қосты. Конференция қорытындысы бойынша әлемдік денсаулық сақтаудағы негізгі құжаттардың бірі – Алматы декларациясы қабылданды, онда алғашқы медициналық-санитарлық көмектің ұлттық жүйесін ұйымдастыру тұжырымдамасы алғаш рет баяндалды.
https://www.inform.kz/kz/almatyda-toregeldi-sharmanovtyn-halykaralyk-syylygy-tapsyryldy_a3850881
