Желтоқсан желі ызғарлы
2023 жылдың 21 желтоқсаны күні университеттің Ғылыми кітапханасының оқу залында Тілдік пәндер кафедрасының доценті Т.Қ.Зайсанбаев, лекторлары Л.С.Бекпентаева, Б.Н.Канленова, РА.Тұрсынбаева, Ғылыми кітапхананың басшысы А.Нұртаева және Анықтама-библиография бөлімінің меңгерушісі С.А.Елеукенова «Желтоқсан желі ызғарлы» атты кездесу-кеш өткізді. Еліміздің Тәуелсіздік күніне және 1986 жылғы Желтоқсан оқиғасына арналған кездесу-кешке Әз-Желтоқсан ұйымының төрағасы, журналист, заңгер Ербол Сәулеұлы қатысты.
Кездесу-кеш шымылдығын ашқан Тілдік пәндер кафедрасының доценті Т.Қ.Зайсанбаев зұлымдық ошағы КСРО-ны шайқалтқан «Желтоқсан оқиғасының» маңызына қысқаша тоқтала келіп, сол қиын кезеңде ел тәуелсіздігі үшін басын қатерге тіккен адамдарды бүгінгі жастар білуі керек екендігіне баса назар аударды.
Желтоқсан көтерілісі туралы Медицина-профилактикалық іс мектебі, 23-001 тобының студенті Әлімбай Асылай «Желтоқсан оқиғасының маңызы» атты мазмұнды баяндама жасады. Бұдан кейін Педиатрия мектебі, 1-к студенті студенті Абдилхамидов Хаийтмурат М.Мақатаевтың «Үш бақытым» атты өлеңін оқып берді.
Кездесу-кешке келген қонақтың құрметіне Медицина мектебінің 23-069 тобының студенті Иренсиз Томирис Әбдімомын Желдібаевтың «Ерке сылқым» күйін, ал Педиатрия мектебі, 23-011 тобының студенті Қапезов Айболат Құрманғазының «Адай» күйін орындап берді.
Желтоқсан оқиғасына қатысқан, сол ызғарлы күндерді өз көзімен көрген куәгер Ербол Сәулеұлы көтерілістің қалай болғанын сипаттап, Кеңестік әскерилердің жауыздық әрекеттерін ашып көрсетті. Ол қазақ жастарының төгілген қанымен келген тәуелсіздік қадірін білу қажеттігіне тоқталып, студенттердің қойған сұрақтарына жауап берді.
Кездесу-кешке кітапхананы дайындап, сол зұлымат кезеңді бейнелейтін бейнероликтер мен архивтік суреттермен безендірген Ғылыми кітапхананың басшысы А.Нұртаева мен Анықтама-библиография бөлімінің меңгерушісі С.А.Елеукенованың еңбегені ерекше атап өткен жөн. Кешті жүргізген бірінші курс студенттері Қыпшақбаев Алибек пен Кульмачева Аружанға да алғысымыз шексіз.
Кеш соңында кеш қонағына және осы кездесу-кешті өткізуге белсене атсалысқан студенттерге Алғыс хаттар табысталды.
Қызықты да мағыналы өткен кездесу-кеш өзінің алдына қойған мақсатына жетті деп нық сеніммен айта аламыз.
