Студенттердің ғылыми үйірмелері жәрмеңкесі
2018 жылдың 12 қазанында ҚазҰМУ-да профессор Балмуханова А.В. басқаратын ғылым және инновациялар департаменті ұйымдастырған дәстүрлі, студенттердің ғылыми үйірмелер жәрмеңкесі өткізілді. Клиникалық және теориялық бағытта жұмыс жасайтын үйірмелер студенттерге өз есіктерін ашты. Жәрмеңкеге 45 кафедра қатысып, өз үйірмелерінің ғылыми жұмысы мен табыстары туралы ақпарат ұсынды. Жәрмеңке қатысушыларын провост, профессор Дайнюс Павалкис пен ғылыми қызмет бойынша проректор Жусупов Б.С. құттықтады.
Студенттік ғылыми үйірме белсенді ғылыми қызметке ықпал етіп қана қоймай, талантты, қабілетті, болашақта өзінің ғылыми жұмысын осы салада магистрант және докторант ретінде жалғастыратын студенттерді анықтауға көмектеседі. Биылғы жылғы жәрмеңке Кампустан алыста орналасқан кафедраларға студенттердің онлайн режимде тіркелуге мүмкіндік берілгенімен ерекшеленді. Студенттердің ғылыми-зерттеу қызметін бағалау және жәрмеңкенің өткізілу сапасын анықтау мақсатында білім алушылармен сауалнама жүргізілді.
Жәрмеңке барысында қызықты зияткерлік ойындар ойнатылып, ең белсенді болған студенттерге сыйлықтар мен сертификаттар ұсынылды.
Жәрмеңкенің соңында осы жобаға белсенді қатысқаны үшін барлық кафедраларға ҚазҰМУ ректоры, профессор Т.С. Нұрғожиннан алғыс хат берілді.
Студенттік ғылыми үйірмеге барлығы 870-ке жуық студент жазылды.
Осы іс-шараның өтуіне демеушілік жасаған «Medical Dress» медициналық киімдер дүкені және «ВАКЦИНАЦИЯ» қоғамдық бірлестігіне ерекше алғысымызды білдіреміз.
