Студенттерімізді Ташкент қаласындағы халықаралық олимпиададағы жеңісімен құттықтаймыз
21-24 қараша аралығында Өзбекстан Республикасының Ташкент қаласындағы Ташкент фармацевтикалық институтының 85 жылдығына арналған халықаралық пән олимпиадасы болып өтті. Халықаралық олимпиада фармакология, фармакогнозия, микробиология, органикалық химия, анорганикалық химия, фармацевтикалық химия, фармацевтикалық технология, токсикологиялық химия, аналитикалық химия, фармацевтикалық биотехнология, фармацевтикалық қызметті ұйымдастыру негіздері, дәрілік формалар технологиясы, кәсіби ағылшын тілі пәндері бойынша Өзбекстан, Қазақстан, Тәжікстан, Ресей, Әзірбайжан, Қарақалпақстан мемлекеттерінің медициналық жоғары оқу орындарының арасында өткізілді.
С.Д.Асфендияров атындағы Қазақ Ұлттық медицина Университетінен Фармакология пәні бойынша «Жалпы медицина» мектебінің 4 курс студенттері Мейрамхан Бердимурат, Жәрдемәлі Майя, Куралова Салтанат белсене қатысты. Олимпиада шарты бойынша бірінші турдан 100 баллдық жүйеден тек 70 баллдан жоғары жинаған қатысушылар екінші турға өтеді. Мейрамхан Бердимурат бірінші турда ең жоғары 96 балл жинаса, ал Жәрдемәлі Майя мен Куралова Салтанат 90 балл жинап, екінші турға жолдама алды.
Екінші күні фармакология пәні бойынша теориялық сұрақтар, ситуациялық есептер және экспериментальді фармакологиядан тәжірибелік дағдылар бойынша бақ сынады. Екі күн жалғасын тапқан олимпиада қорытындысы бойынша Фармакология пәні бойынша Халықаралық олимпиаданың 1 орын иегері Мейрамхан Бердимурат (жетекшісі: фармакология кафедрасының ассистенті, клиникалық фармаколог Молайханов Шохмурод Анарханович), 3 орын иегері Жәрдемәлі Майя (жетекшісі: фармакология кафедрасы меңгерушісі, м.ғ.к., қауымдастырылған профессор Сатбаева Эльмира Маратовна), ал Куралова Салтанат белсене қатысқаны үшін арнайы сертификатпен марапатталды.
Халықаралық олимпиадада жеңімпаз атанған студенттерімізді шын жүректен құттықтаймыз! Студенттерді дайындауға атсалысқан кафедра меңгерушісі, м.ғ.к., қауымдастырылған профессор Сатбаева Эльмира Маратовна, профессор Кадырова Диляра Мулдашевна, доцент Смагулова Гульмира Советбековна, ассистент Молайханов Шохмурод Анарханович, асистенттер Турсымбек Шыңғыс Нұрланұлы мен Хайитова Малика Давранбековналарға шексіз алғысымызды білдіреміз! Жеңіс құтты болсын!
