Қазақ ұлттық медицина университетінің патологиялық физиология кафедрасына Әділман Нұрмұхамбетовтің есімі берілді

07.06.2024 | просмотров: 535

Санжар Асфендияров атындағы Қазақ ұлттық медицина университетінде «Тағзым» акциясы аясында патологиялық физиология кафедрасына профессор Әділман Нұрмұхамбетовтің есімін беру рәсімі өтті. Іс-шараға университет ардагерлері, профессор-оқытушылар құрамы, қызметкерлері мен студенттері, көрнекті профессор Әділман Нұрмұхамбетовтің туған-туыстары қатысты.

«ҚазҰМУ ұжымы атынан профессордың отбасына зор құрмет пен алғыс білдіргім келеді. Біз Сіздердің қайғыларыңызға ортақпыз, дегенмен профессордың мұрасының бір бөлшегі болғанымызды мақтан тұтамыз.

Әділман Нұрмұхамбетұлының есімі ғылым, білім мен өз ісіне деген адалдықтың маңыздылығының айқын бейнесіне айналсын. Оның саналы ғұмыры мен еңбек жолы бізді жаңа жетістіктер мен жеңістерге жігерлендіре түссін», – деді өз сөзінде ҚазҰМУ проректоры Убайдилла Датхаев.

Әділман Нұрмұхамбетов – Қазақстандағы экологиялық патофизиологияның негізін салушы. Еуропалық лимфологтар қоғамының, Ресей Федерациясының морфологиялық пәндер бойынша үйлестіру кеңесінің мүшесі болды. Өз мансабында ол дизельдік қозғалтқыштың шығарындылары мен ауыр металдар сынды антропогендік қоршаған ортаны ластаушы заттардың организмге әсер етуінің негізгі механизмдерін түсінуге елеулі үлес қосты.

А.Н. Нұрмұхамбетов жетекшілігімен 3 докторлық және 16 кандидаттық диссертацияларды дайындалып, қорғалды. Патологиялық физиология бойынша мемлекеттік тілдегі 5 оқулықтың авторы. Оның ғылыми еңбектері Италия, БАӘ және Қытайда жарияланған.

С.Ж. Асфендияров атындағы Қазақ ұлттық медицина университетінде профессор Әділман Нұрмұхамбетов 1975 жылдан бастап патофизиология кафедрасын басқарды, соңғы жылдары кафедрада профессор болды және медициналық білімнің дамуына зор үлес қосты, Жалпы медицина мектебінің мақтанышы әрі көшбасшыларының бірі болды. Ол 2021 жылдың сәуір айында дүниеден өтті.
«Тағзым» акциясы отандық медицина мен университеттің дамуына үлес қосқан біртуар тұлғалардың есімдерін мәңгілік ұлықтау мақсатында өткізілуде. Университеттің аудиториялары мен залдарына Төрегелді Шарманов, Серік Ақшолақов, Камал Ормантаев, Сибугатулла Қарынбаев, Григорий Зальцман, Нина Барлыбаева, Лидия Зазулевская және Қалдан Төлеуов есімдері берілді.