ҚазҰМУ академик Күзденбаева Раиса Салмағамбетқызының дүниеден өтуіне байланысты көңіл айтады
С. Ж. Асфендияров атындағы Қазақ ұлттық медицина университетінің ұжымы көрнекті ғалым, Қазақстан Республикасы Ұлттық ғылым академиясының академигі, медицина ғылымдарының докторы, профессор Күзденбаева Раиса Салмағамбетқызының дүниеден өтуіне байланысты қайғыға ортақтасып, туған-туыстары мен жақындарына, әріптестері мен шәкірттеріне көңіл айтады.
Раиса Салмағамбетқызының өмірден озуы отандық медицина ғылымы, фармакология саласы, жоғары медициналық білім беру жүйесі мен жалпы денсаулық сақтау саласы үшін орны толмас ауыр қаза.
Күзденбаева Раиса Салмағамбетқызы қазақ медицина ғылымының көрнекті өкілдерінің бірі, аса білікті ғалым-фармаколог, дарынды ұстаз, тағылымы терең тәлімгер және саланың дамуына зор үлес қосқан тәжірибелі ұйымдастырушы болды. Оның саналы ғұмыры клиникалық және эксперименттік фармакологияны дамытуға, білікті мамандар даярлауға, ғылыми мектеп қалыптастыруға және елдің зияткерлік әлеуетін нығайтуға арналды. Ол отандық фармацияның дамуына айрықша еңбек сіңіріп, жаңа дәрілік препараттарды тәжірибеге енгізуге, Қазақстанның табиғи шикізаты негізінде бірегей дәрілік заттарды әзірлеуге, фармакологиялық сараптама жүйесін жетілдіруге өлшеусіз үлес қосты. Оның қажырлы еңбегі мен терең ғылыми көрегендігінің арқасында ұлттық фармакология мен фармацевтикалық ғылымның берік негізі қаланды.
Раиса Салмағамбетқызы әрдайым биік ғылыми беделімен, парасат-пайымымен, ұстаздық ұлағатымен ерекшеленіп, көптеген дәрігерлерге, фармакологтарға, зерттеушілер мен оқытушыларға бағыт-бағдар берген ардақты тұлға болды. Оның ғылыми мұрасы, еңбектері, жаңалықтары мен шәкірттері отандық медицина тарихының ажырамас бөлігі.
Раиса Салмағамбетқызының жарқын бейнесі, ғылымға деген адалдығы, жоғары адамгершілігі мен қажырлы еңбегі оны таныған жандардың жадында мәңгі сақталады.
ҚазҰМУ ұжымы орын толмас қайғыға ортақтасып, отбасы мен туған-туыстарына, әріптестері мен шәкірттеріне және еліміздің ғылыми-медициналық қауымдастығына көңіл айтады.
