ҚазҰМУ-да 8 наурыз – Халықаралық әйелдер күніне арналған мерекелік кеш өтті
С. Ж. Асфендияров атындағы Қазақ ұлттық медицина университетінде 8 наурыз – Халықаралық әйелдер күніне орай салтанатты концерт өтті. Мерекелік іс-шараға университеттің профессор-оқытушылар құрамы, қызметкерлері және студенттері қатысты. Бұл күні ҚазҰМУ-дың әйел қауымына олардың жоғары кәсібилігі, өз ісіне адалдығы, білім беру, ғылым, медицина және университеттің қоғамдық өмірін дамытуға қосып жүрген елеулі үлесі үшін шынайы алғыс пен құрмет сөздері айтылды.
Бұл мереке ҚазҰМУ ұжымы үшін ерекше мәнге ие. Себебі университет қызметкерлерінің шамамен 70 пайызын әйелдер құрайды. Олар оқу орнының зияткерлік әлеуетін қалыптастыруда, кәсіби мәдениетін нығайтуда және адамгершілік құндылықтарын дамытуда маңызды рөл атқарады. Білім беріп, ем жасап, тәлімгерлік танытып, қолдау көрсетіп жүрген әйелдер университет қабырғасында ізгілік пен мейірімге толы ерекше орта қалыптастырып келеді.
Салтанатты шара барысында университеттің әйел қызметкерлеріне ҚазҰМУ кәсіподақ комитеті тарапынан сыйлықтар, жолдамалар, құрмет грамоталары мен марапаттар табысталды. Бұл – олардың адал еңбегіне, белсенді өмірлік ұстанымына және университеттің дамуына қосқан сүбелі үлесіне көрсетілген құрмет пен ризашылықтың белгісі.
Мерекелік концерт ҚазҰМУ өміріндегі жарқын әрі әсерлі кештердің бірі болды. Бұл кеш әйелдердің университет өміріндегі айрықша орны мен маңызын тағы бір мәрте айқындап, олардың еңбегіне деген құрмет пен алғыстың көрінісіне айналды.
