С.Ж.Асфендияров атындағы ҚазҰМУ-да Кеңес Одағының батыры М.Мәметованың 100 жылдығына арналған еске алу іс-шарасы өтті.

С.Ж.Асфендияров атындағы Қазақ ұлттық медицина университетінде ағымдағы жылдың 3-ші қазан күні Кеңес Одағының батыры Мәншүк Мәметованың 100 жылдығына арналған еске алу іс-шарасы өтті. Мәншүк осы медицина университеті қабырғасында 2-ші курста оқып жүрген кезінде, өз еркімен майданға аттанған болатын. Батыр қыздың ерлігін жас ұрпаққа үнемі айтып отыру біздің парызымыз, жылда еске алу кешін өткізу оқу орнымызда дәстүрге айналған. Іс-шараның бірінші бөлімі «Ұлы Отан соғысында қаза тапқан батыр-медиктер» меморилдық ескерткішіне гүл шоғын қоюдан басталды. Батырлар ескерткіші жанында университет ректоры М.Е.Шоранов, әскери кафедрасының жетекшісі Ж.Т.Исабаев сөз сөйлеп, Жалпы медицина мектебінің 4 курс студенті Г.Серғалы ақын А.Бахтыгерееваның «Мәншүкке» арнаған өлеңін оқыды.
Аталған жиынның ұйымдастырылып өткізілуіне Әлеуметтік-тәрбие жұмыстар департаменті, Әскери кафедра, Қазақстан тарихы және әлеуметтік-гуманитарлық пәндер кафедрасы, ҚазҰМУ мұражайы, мектептер біріге жұмыс жасады.
Ескерткіш жанындағы жиыннан соң, қатысушылар ректорат ғимаратында орналасқан Т.Шарманов Даңқ залында өтетін негізгі бөлімге өтті. Іс-шара барысында проректор У.М.Датхаев, доцент Б.Қ.Аққасов, Медициналық қызметінің полковнигі, ардагер Б.А. Каленов сөз сөйлеп, сондай-ақ 2012 жылы университет атынан қазақтың батыр қызы жерленген жері Ресей Федерациясының Псков облысы, Невель қаласына барып қайтқан іс-сапардан әскери кафедрасының аға оқытушысы А.Т.Лесбаев естелік әңгімесімен ой бөлісті. Батыр қыз М.Мәметова жайлы университет дайындаған «Аңыз өмір» деректі фильмі көрсетілді. Студенттер Ж.Қасымханов, А.Амир іс-шараны жүргізді, А.Абдизакирова, Г.Серғалы Мәншүкке арнап жазған ақындардың өлеңдерін оқып, әскери кафедрасының аға оқытушысы Н.И.Насыров «Журавли», 1 курс студенті А. Сағымжан «Болмасын соғыс» әндерін орындады.
Өрімдей жасында ұмытылмас ерлік жасап, қайтпас қайсарлығын көрсеткен, жас өмірін бейбіт өмір үшін құрбан еткен қазақтың батыр қызы Мәншүктің есімі ел есінде.
Тәрбие ісі бөлімінің бас маманы
С.А.Апсаттарова