Тәжікстандағы Қазақстан медицинасы күндері: Исамдун Харамов «Ақсай» университеттік клиникасының балалардағы күрделі ортопедиялық ауруларды емдеудегі озық тәжірибесін таныстырды
Тәжікстан Республикасында өткен Қазақстан медицинасы күндері аясында медицина ғылымдарының кандидаты, жоғары біліктілік санатындағы балалар ортопед-травматологы, ҚазҰМУ-дың «Ақсай» университеттік клиникасы ортопедия бөлімшесінің меңгерушісі Исамдун Каудунұлы Харамов балалардағы тірек-қимыл аппаратының күрделі ауруларын диагностикалау және хирургиялық емдеу саласындағы Қазақстанның озық тәжірибесін таныстырды.
Сапар бағдарламасы клиникалық практиканы, кәсіби тәжірибе алмасуды және медицина мамандарын оқытуды біріктірді. Исамдун Харамов «Шифобахш» ұлттық медициналық орталығының балалар травматологиясы және ортопедиясы бөлімшесіндегі пациенттерге консультация беріп, тәжікстандық әріптестерімен бірге күрделі клиникалық жағдайларды талқылады, сондай-ақ балалардың табанына жасалған хирургиялық араласулар мен сколиозды түзету операцияларына қатысты.
Әрбір баламен жұмыс істеу жоғары хирургиялық дәлдікті, терең клиникалық ойлауды және жеке тәсілді талап етті. «Ақсай» университеттік клиникасы маманының көпжылдық тәжірибесі пациенттер үшін оңтайлы емдеу тактикасын айқындауға ғана емес, әріптестеріне балалар ортопедиялық хирургиясының заманауи әдістерін көрсетуге де мүмкіндік берді. Балалардың қауіпсіздігіне, хирургиялық араласуларды мұқият жоспарлауға және барынша жоғары функционалдық нәтижеге қол жеткізуге ерекше назар аударылды.
Практикалық жұмыс білім беру және ғылыми бағытта жалғасын тапты. Тәжікстан Республикасы травматологтар қоғамының отырысында Исамдун Харамов «Ақсай» университеттік клиникасының балалардағы күрделі ортопедиялық патологияларды емдеу тәжірибесін таныстырды. Оның қатысуы білім мен хирургиялық шеберлік нақты пациентке көмек көрсетуге ғана емес, заманауи емдеу әдістерін одан әрі қолдана алатын әріптестерді даярлауға бағытталатын медицинаға кәсіби қызмет етудің үлгісіне айналды.
Исамдун Харамовтың Қазақстан медицинасы күндеріне қатысуы қазақстандық балалар ортопедиясы мектебінің жоғары деңгейін көрсетті. Өткізілген консультациялар, операциялар мен клиникалық талдаулар жай ғана тәжірибе алмасу емес, балаларға көрсетілген нақты көмек әрі Қазақстан мен Тәжікстан арасындағы кәсіби ынтымақтастықты дамытуға қосылған үлес болды. Маманның әрбір клиникалық шешімінің артында көпжылдық тәжірибе, айрықша жауапкершілік және нағыз дәрігерге тән басты қасиет — баланың еркін қозғалып, толыққанды өмір сүру мүмкіндігін қайтаруға деген ұмтылыс тұр.
