ҚазҰМУ Фармация мектебінің өкілдері Eurasia-Pacific Uninet халықаралық отырысына және Erasmus+ семинарына қатысты
2026 жылғы 7–9 қазан аралығында Алматы қаласындағы Әл-Фараби атындағы Қазақ ұлттық университетінде Еуразия-Тынық мұхиты университеттер желісінің (Eurasia-Pacific Uninet, EPU) пленарлық отырысы және академиялық ынтымақтастықты дамыту мәселелеріне арналған Erasmus+ халықаралық семинары өтті.
Іс-шараға Аустрия, Қытай, Үндістан, Моңғолия, Қазақстан, Қырғызстан және Өзбекстан елдерінің жоғары оқу орындары мен ғылыми-зерттеу ұйымдарының өкілдері, сондай-ақ жоғары білім беру саласындағы сарапшылар қатысты. Іс-шараны Аустрияның білім беру және интернационалдандыру агенттігі (OeAD), Еуразия-Тынық мұхиты университеттер желісі (EPU) және Әл-Фараби атындағы Қазақ ұлттық университеті Қазақстандағы Erasmus+ ұлттық офисінің қолдауымен ұйымдастырды.
Халықаралық іс-шараға С. Ж. Асфендияров атындағы Қазақ ұлттық медицина университеті Фармация мектебінің өкілдері — Фармация мектебінің деканы З. Б. Сакипова және ботаника курсы бар фармакогнозия кафедрасының ассистенті Н. А. Рахимова қатысты.
Фармация мектебінің шетелдік университеттермен академиялық ұтқырлықты, ғылыми ынтымақтастықты және кәсіби тәжірибе алмасуды дамытуға бағытталған Erasmus+ халықаралық бағдарламаларын іске асыру бойынша көпжылдық практикалық тәжірибесі бар.
Атап айтқанда, Люблин медицина университетімен (Medical University of Lublin, Польша) ынтымақтастық аясында «Фармакогнозия және табиғи өнімдер химиясы саласында білім алмасу (дәрілік өсімдіктер мен ара шаруашылығы өнімдері)» бағыты бойынша Erasmus+ KA107-2019 академиялық ұтқырлық бағдарламасы, сондай-ақ табиғи қосылыстардың бактерияға қарсы және зеңге қарсы белсенділігін референттік зерттеу әдістерін қолдана отырып скринингтеуді қоса алғанда, микробиология саласында білім алмасуға арналған KA107 (2020–2023) және KA107 (2023–2025) бағдарламалары іске асырылды.
Халықаралық әріптестіктің одан әрі дамуы Люблин медицина университетімен (Польша) университетаралық ынтымақтастық туралы келісім негізінде жүзеге асырылатын «Қазақстан Республикасы флорасының дәрілік өсімдіктерін этнофармацевтикалық зерттеу» бағыты бойынша Erasmus+ KA171 (2023–2025) және KA171 (2025–2028) бағдарламаларында көрініс тапты. Аталған бағдарламалар оқытушылар мен докторанттардың академиялық ұтқырлығын, ғылыми тәжірибе алмасуды және Қазақстанның перспективалы дәрілік өсімдіктерін фармацевтикалық практикада одан әрі қолдану мақсатында бірлескен ғылыми зерттеулер жүргізуді көздейді.
Фармация мектебі өкілдерінің халықаралық іс-шараға қатысуы ҚазҰМУ-дың академиялық байланыстарын кеңейтуге, шетелдік университеттермен тәжірибе алмасуға және бірлескен білім беру мен ғылыми бастамаларды іске асыру перспективаларын талқылауға маңызды мүмкіндік берді.
Іс-шараның ашылуында Әл-Фараби атындағы ҚазҰУ-дың бірінші проректоры Самғат Ермекбаев, Аустрияның Қазақстандағы елшісі Андреа Бахер, OeAD агенттігінің басқарушы директоры Якоб Калице және EPU президенті Йозеф Штробль құттықтау сөз сөйледі.
Пленарлық отырыстың негізгі мақсаты Аустрия мен Орталық, Шығыс және Оңтүстік Азия университеттері арасындағы академиялық әріптестікті нығайту болды. Қатысушылар халықаралық академиялық ұтқырлық, бірлескен ғылыми зерттеулер, білім беру саласындағы инновациялар және Erasmus+ бағдарламасы ұсынатын мүмкіндіктерге ерекше назар аударды.
Тақырыптық сессиялар аясында Қазақстан, Қырғызстан және Өзбекстан елдерінің Erasmus+ ұлттық офистерінің (NEO) өкілдері мен жоғары білім беруді реформалау жөніндегі сарапшылары (HERE) халықаралық білім беру бағдарламаларының университеттердің дамуына және жоғары білім сапасын арттыруға ықпалын талқылады.
Қазақстандағы Erasmus+ ұлттық офисінің үйлестірушісі Лаура Палуанова Аустрияның өңір елдерімен ынтымақтастық тәжірибесіне және Erasmus+ бағдарламасының жоғары білім беруді дамытуға ықпалына арналған екі негізгі сессияның модераторы болды.
Бағдарламаның маңызды бөлігін университеттік білім берудің болашағы, оның еңбек нарығының талаптарына сәйкестігі және оқытудың жаңа тәсілдерін енгізу қажеттілігі жөніндегі панельдік пікірталастар құрады.
HERE командасының мүшесі және Қорқыт Ата атындағы Қызылорда университетінің академиялық мәселелер жөніндегі проректоры Дана Абдрашева университеттердің еңбек нарығымен өзара іс-қимылы және болашақта сұранысқа ие құзыреттерді қалыптастыру мәселелерін талқылауға қатысты.
CIMEA ұйымының Орталық Азиядағы директоры Айтжан Кулумжанова жаһандық өзгерістер жағдайында Азиядағы жоғары білім беру жүйесінің трансформациясына арналған пікірталасқа сарапшы ретінде қатысты.
Қатысушылар халықаралық ынтымақтастықтың, білім беру бағдарламаларын жаңғыртудың және ғылыми жетістіктерді оқу үдерісіне интеграциялаудың маңыздылығын атап өтті. Бұл бағыттар медициналық және фармацевтикалық білім беру үшін ерекше өзекті, өйткені білікті мамандарды даярлау кәсіби құзыреттерді үздіксіз жетілдіруді талап етеді.
Іс-шараның маңызды бөліктерінің бірі қатысушыларға Аустрияның оннан астам жоғары оқу орнының өкілдерімен танысуға мүмкіндік берген Marketplace презентациялық алаңы болды.
Кәсіби пікір алмасу барысында университетаралық әріптестікті дамыту, бірлескен білім беру бағдарламаларын іске асыру, академиялық ұтқырлық және ғылыми-зерттеу жобаларын жүзеге асыру перспективалары талқыланды.
ҚазҰМУ Фармация мектебінің өкілдері үшін бұл алаң халықаралық тәжірибемен танысуға және фармацевтикалық білім беру мен ғылым саласындағы ынтымақтастықтың перспективалы бағыттарын айқындауға мүмкіндік берді.
Шетелдік университеттермен кәсіби байланыстар орнату алдағы уақытта білім мен тәжірибе алмасуға, бірлескен ғылыми бастамаларды дамытуға, сондай-ақ оқытушылар мен білім алушылардың кәсіби өсу мүмкіндіктерін кеңейтуге негіз қалайды.
