«Ақсай» балалар денсаулық орталығында Ашық есік күні ұйымдастырылды
Халықаралық балаларды қорғау күні қарсаңында «Ақсай» балалар денсаулық орталығында Ашық есік күні ұйымдастырылды.
Іс-шараның басты мақсаты – балаларға кеңестік-диагностикалық көмек көрсету, сондай-ақ ата-аналарға мамандарға уақтылы жүгінудің және баланың денсаулығына жауапкершілікпен қараудың маңыздылығы туралы профилактикалық түсіндіру жұмыстарын жүргізу болды.
Күні бойы орталықтың білікті мамандары – кардиолог, аллерголог, ультрадыбыстық диагностика (УДЗ) дәрігері, хирург, балалар эндокринологы, педиатр, невропатолог, нефролог, оториноларинголог (ЛОР), пульмонолог, гематолог, уролог, ортопед және офтальмолог – 280-нен астам баланы қабылдап, тексеріп, кеңес берді.
Мерекелік көңіл күйді балаларға Air Astana компаниясының өкілдері сыйлады. Олар орталыққа арнайы келіп, бүлдіршіндерге сыйлықтар табыстап, қызықты театрландырылған қойылым көрсетті. Кішкентай көрермендер үшін бұл – шынайы қуаныш пен жарқын әсерге толы күн болды.
Сондай-ақ, балаларды мерекемен құттықтап, өз сыйлықтарын тарту еткен Наурызбай ауданы әкімдігінің өкілдері де іс-шараға қатысты. Олар әрбір балаға шын жүректен қамқорлық пен ізгі тілектерін жеткізді.
«Ақсай» балалар орталығында мұндай іс-шаралар игі дәстүрге айналған. Мұнда ерте диагностикаға, аурулардың алдын алуға және ата-аналардың балалар денсаулығына саналы көзқарасын қалыптастыруға айрықша мән беріледі.
Балаларды қорғау күні – бұл тек қуанышты мереке ғана емес, сонымен қатар әрбір баланың құқығы мен денсаулығын қорғаудың маңыздылығын еске салатын ерекше күн.
Барлық балалар махаббатқа, қауіпсіздікке бөленіп, ең бастысы – сау әрі бақытты болып өссін!
