Мәңгі жадымызда. Қадірлейміз. Жолын жалғаймыз: Алматыда еліміздің медицина майталманы Жалғау Шәкірұлы Исалиевтің құрметіне мемориалдық тақта орнатылды
2025 жылғы 4 сәуірде С.Ж. Асфендияров атындағы ҚазҰМУ-ға қарасты «Ұлттық акушерлік, гинекология және перинатология орталығының» аумағында көрнекті дәрігер, ғалым және мемлекет қайраткері — Жалғау Шәкірұлы Исалиевке арналған мемориалдық тақтаның салтанатты ашылу рәсімі өтті.
Жалғау Исалиевтің есімі отандық медицинаның тарихына мәңгілікке жазылды. Ол акушерлік және гинекология институтының негізін қалаушылардың бірі болды, Қазақстанда алғашқы ультрадыбыстық зерттеу аппаратын енгізді, бүгінде елдегі әйелдер мен балалар денсаулығының стандарттарын айқындап отырған ғылыми мектептің іргесін қалады. Оның Қазақстан Республикасының денсаулық сақтау жүйесін қалыптастыру мен дамытуға қосқан үлесі — шын мәнінде дәуірлік маңызға ие.
Жалғау Исалиев Қазақ КСР Денсаулық сақтау министрлігіне қарасты акушерлік және гинекология ғылыми-зерттеу институтының тұңғыш директоры, денсаулық сақтау министрінің орынбасары болды. Ол — реформатор, педагог әрі гуманист. Ол тек адамдарды емдеумен ғана шектелмей, кәсібилік пен қамқорлық құндылықтарына негізделген, адамға бағытталған денсаулық сақтау жүйесін қалыптастырған тұлғалардың бірі еді.
Салтанатты шараға қатысқандар:
- Алматы қаласы әкімінің орынбасары Әсем Бекқызы Нүсіпова
- С.Ж. Асфендияров атындағы ҚазҰМУ ректоры Марат Едігеұлы Шоранов
- Алматы қалалық мәслихатының депутаты, «Атрикс-Строй» ЖШС бас директоры Әміржан Әміржанұлы Нәбиев
- «Акушерлік, гинекология және перинатология ғылыми орталығы» АҚ директорлар кеңесінің төрайымы Зәуреш Жұманәліқызы Аманжолова
- Алмалы ауданы ардагерлер кеңесінің төрағасы Батай Маманұлы Қабылов
- Жалғау Шәкірұлының жұбайы Сара Рахманқұлқызы Исалиева
С.Ж. Асфендияров атындағы ҚазҰМУ ректоры Марат Шоранов өз сөзінде былай деп атап өтті:
«Біз бұл жерге жай ғана ескерткіш тақта ашу үшін жиналмадық. Біз – өз өмірін тұтас елдің тағдырымен тоғыстырған тұлғаға алғыс білдіру үшін келдік. Жалғау Шакирович жай ғана бір дәуірде өмір сүрген жоқ – ол сол дәуірді өзі жасады. Оның өмір жолы – қызметке, кәсібилікке және асқақ гуманизмге толы үлгі. Бүгін біз осы ескерткіш тақтаны аша отырып, университетіміздің ғана емес, бүкіл Қазақстан медицинасының алғысқа толы шежіресіне жаңа бір парақ қостық».
Мемориалдық тақта ҚазҰМУ-дың «Тағзым» атты дәстүрлі жобасы аясында орнатылды. Бұл бастама – елге еңбегі сіңген тұлғалардың есімін ұлықтап, құндылықтарды сақтау мен медициналық қауымдастықтағы ұрпақтар сабақтастығын нығайтуды мақсат етеді.
Жалғау Шәкірұлы Исалиев – медицина жолын таңдаған әрбір жанға үлгі. Оның есімі – тек тарих қана емес, болашаққа бағыт беретін шамшырақ.
