Ғылым мен практиканың синергиясы: ҚазҰМУ делегациясының Тәжікстандағы Қазақстан медицинасы күндеріне қатысуы балалар денсаулығын сақтауды жаңа деңгейге көтерді
ДУШАНБЕ, ТӘЖІКСТАН РЕСПУБЛИКАСЫ – 2026 ЖЫЛҒЫ 25–27 ТАМЫЗ. С.Ж. Асфендияров атындағы Қазақ ұлттық медицина университетінің (ҚазҰМУ) делегациясы Душанбе қаласында өткен Қазақстан медицинасы күндеріне қатысты. Бұл сапар екіжақты қатынастарды дамытудағы ғылым мен практика синергиясының іс жүзінде жүзеге асуының жарқын үлгісіне айналып, Қазақстан мен Тәжікстан арасындағы ғылыми-практикалық ынтымақтастық пен академиялық алмасу үшін жаңа мүмкіндіктер ашты. Делегация құрамына университеттің жетекші мамандары кірді:
- Исамдун Каудунович Харамов – м.ғ.к., жоғары біліктілік санатындағы балалар ортопед-травматологы, «Ақсай» университеттік клиникасының ортопедия бөлімшесінің меңгерушісі;
- Роза Жақановна Сейсебаева – м.ғ.д., амбулаториялық-емханалық педиатрия кафедрасының меңгерушісі;
- Жанар Жеңісқызы Нұрғалиева – м.ғ.к., амбулаториялық-емханалық педиатрия кафедрасының профессоры;
- Мира Зекенқызы Ажахметова – м.ғ.к., амбулаториялық-емханалық педиатрия кафедрасының қауымдастырылған профессоры.
ҚазҰМУ мамандарының қатысуы екі елдің медициналық ынтымақтастық бағдарламасына сапалы жаңашылдықтар енгізіп, теориялық талқылаудан «Шифобахш» ұлттық медициналық орталығының, «Истиклол» медициналық кешенінің және №15 денсаулық орталығының базасында озық медициналық технологиялар мен клиникалық практикаларды тікелей трансферттеуге көшуге мүмкіндік берді. Пациенттерге консультациялар жүргізіліп, күрделі клиникалық жағдайлар, сондай-ақ балалар жасындағы ауруларды емдеудің заманауи педиатриялық және хирургиялық тәсілдері жан-жақты талқыланды.
ҚазҰМУ мамандары Әбу Әли ибн Сино атындағы Тәжік мемлекеттік медицина университетінің медицина қызметкерлері мен профессорлық-оқытушылық құрамына мына бағыттар бойынша ауқымды клиникалық, консультациялық және әдістемелік көмек көрсетті:
- Педиатриялық ортопедиядағы жоғары технологиялық хирургия.
Қазақстандық мамандар балалардағы омыртқа деформацияларын хирургиялық түзетудің аса күрделі әдістерін практикада қолдануды көрсетті. Дәрігер И.К. Харамов «Ақсай» университеттік клиникасының сколиозды хирургиялық емдеу саласындағы бірегей тәжірибесін таныстырды.
Академик Н.Д. Батпенов атындағы Ұлттық ғылыми травматология және ортопедия орталығының (Астана) дәрігері Сейдали Сапаралиевич Абдалиевпен бірлесіп, табанға жасалатын күрделі хирургиялық араласулар мен балалардағы сколиозды хирургиялық емдеуді қоса алғанда, бірлескен көрнекі операциялар жүргізілді.
- Ауыр соматикалық патологияларды емдеудің озық тәсілдері.
Амбулаториялық-емханалық педиатрия кафедрасының мамандары балалардағы өмірге қауіп төндіретін және созылмалы ауруларды, соның ішінде муковисцидозды, жедел бронхиолитті, жүрек патологияларын, 1-типті қант диабетін, семіздік пен бронх демікпесін диагностикалау және емдеудің заманауи хаттамаларын енгізді.
- Ерте араласу, шұғыл көмек және профилактика жүйесі.
Тәжік әріптестерін балалар жасындағы ауруларды ықпалдастыра жүргізуге (БЖАИЖ), емшек сүтімен емізу бойынша кеңес беруге, ерте араласу әдістеріне, РМРР-ға, сарғаюы бар жаңа туған нәрестелерді жүргізуге, сондай-ақ ауруханаға дейінгі кезеңде балаларға шұғыл көмек көрсету алгоритмдеріне оқыту ерекше жаңашылдық болды. Балалар пульмонологиясы, аллергологиясы, эндокринологиясы және кардиологиясы бағыттары бойынша практикалық көмек көрсетілді.
- Балалардағы аутизм спектрінің бұзылыстарына сараланған тәсіл мәселелері.
Аутизм спектрінің бұзылыстары (АСБ) бар балаларды диагностикалау және жүргізу бойынша инновациялық білім беру бағдарламалары.
ҚазҰМУ делегациясының сапар бағдарламасы мазмұнды болды және шеберлік сыныптарын, семинарларды, клиникалық талдауларды және пациенттерді консультациялық қабылдауды қамтыды.
Осылайша, бірлескен операциялар мен клиникалық талдаулар технологиялар трансфертіне, балалар жасындағы патологияларды диагностикалау мен емдеудің заманауи стандарттарын енгізуге, оларды МСАК деңгейінде жүргізуге және аурулардың алдын алуға берік негіз қалады. Тәжікстандық дәрігерлер «Ақсай» университеттік клиникасы мен ҚазҰМУ Педиатрия мектебі қызметкерлерінің озық әдістемелері мен практикалық тәжірибесіне қол жеткізді.
С.Ж. Асфендияров атындағы ҚазҰМУ делегациясы сапарының негізгі оқиғасы Қазақстан мен Тәжікстанның жетекші жоғары оқу орындары – ҚазҰМУ мен Әбу Әли ибн Сино атындағы Тәжік мемлекеттік медицина университеті арасындағы меморандумға қол қою болды.
Университет қызметкерлерінің «Тәжікстандағы Қазақстан медицинасы күндері» іс-шарасына қатысуы Қазақстан мен Тәжікстанның медициналық ұйымдары арасындағы педиатрия, алғашқы медициналық-санитариялық көмек, балалар ортопедиясы және травматологиясы салаларындағы академиялық, ғылыми және практикалық байланыстарды одан әрі дамытуға сенімді негіз қалады.
ҚазҰМУ өзінің үздік тәжірибелерін халықаралық деңгейде табысты таратып, Қазақстанның медициналық білімі мен ғылымының көшбасшысы мәртебесін тағы да растады.
