Қазақстан Республикасының Тәуелсіздігінің 35 жылдығына арналған санитариялық-эпидемиологиялық қызмет қызметкерлерінің халықаралық конгресі
2026 жылғы 15 қыркүйекте Алматы қаласында алғаш рет Қазақстан Республикасының Тәуелсіздігінің 35 жылдығына арналған Санитариялық-эпидемиологиялық қызмет қызметкерлерінің халықаралық конгресі өтті.
Ауқымды іс-шараға мемлекеттік органдардың, денсаулық сақтау ұйымдарының, ғылыми-білім беру қауымдастығының, кәсіби бірлестіктердің, жеке және үкіметтік емес секторлардың өкілдері, сондай-ақ отандық және халықаралық жетекші сарапшыларды қоса алғанда, 700-ден астам қатысушы жиналды.
Конгресс санитариялық-эпидемиологиялық саламаттылықты және халықтың биологиялық қауіпсіздігін қамтамасыз етудің заманауи тәсілдерін талқылауға, кәсіби тәжірибе алмасуға және санитариялық-эпидемиологиялық қызметті одан әрі дамытудың өзекті мәселелері мен перспективаларын қарастыруға арналған маңызды кәсіби алаңға айналды.
Іс-шараның маңыздылығын айқындай түскен айтулы даталар – Қазақстанның санитариялық-бактериологиялық зертханалар желісінің қалыптасқанына 105 жыл және көрнекті ғалым, эпидемиолог, аса қауіпті инфекциялар саласындағы отандық ғылыми мектептің негізін қалаушылардың бірі Масғұт Айқымбаевтың туғанына 110 жыл толуы.
Конгреске қатысушыларға Қазақстан Республикасының Денсаулық сақтау вице-министрі Тимур Сүлейменов, Алматы қаласы әкімінің орынбасары Нұрлан Абдрахимов және Санитариялық-эпидемиологиялық бақылау комитетінің төрағасы Сархат Бейсенова құттықтау сөздерін арнады.
Іс-шараға бейнеүндеу форматында ТМД Бас хатшысының орынбасары Н. Сейтимов және Дүниежүзілік денсаулық сақтау ұйымының Қазақстандағы Елдік кеңсесінің басшысы, доктор Скендер Сыла да құттықтау жолдады.
Халықаралық форумның жұмысына Қазақстан, Қытай, Италия, Қырғызстан, Ресей және Өзбекстаннан келген мамандар мен сарапшылар қатысты.
С.Ж. Асфендияров атындағы Қазақ ұлттық медицина университеті де Конгресс жұмысына белсенді қатысты. Ғылыми-практикалық бағдарлама аясында Х. Досмұхамедов атындағы Қоғамдық денсаулық сақтау мектебінің деканы Қожекенова Ж.А. заманауи санитариялық-эпидемиологиялық қызмет үшін кадрлар даярлау мәселелеріне арналған баяндама жасады.
Баяндамада білім беру бағдарламаларын жетілдіру, болашақ дәрігер-гигиенистер мен эпидемиологтардың заманауи кәсіби құзыреттерін қалыптастыру, университет, практикалық денсаулық сақтау ұйымдары мен жұмыс берушілер арасындағы өзара іс-қимылды нығайту мәселелері қамтылды.
Сондай-ақ қазіргі эпидемиологиялық сын-қатерлер жағдайында, санитариялық-эпидемиологиялық қадағалауды цифрландыру, тәуекелге бағдарланған тәсілдерді енгізу, деректерді талдаудың заманауи әдістерін және жасанды интеллект технологияларын пайдалану жағдайында тиімді жұмыс істей алатын мамандарды даярлаудың маңыздылығына ерекше назар аударылды.
ҚазҰМУ-дың Конгреске қатысуы университеттің білім беру әлеуетін таныстыруға, отандық және шетелдік әріптестермен тәжірибе алмасуға, сондай-ақ Қазақстанның санитариялық-эпидемиологиялық қызметі үшін кадрлар даярлаудың одан әрі даму бағыттарын талқылауға мүмкіндік берді.
Конгресстің өткізілуі мамандар, ғылыми және білім беру ұйымдары, мемлекеттік құрылымдар мен халықаралық әріптестер арасындағы ынтымақтастықты нығайтуға, тәжірибе алмасуға және Қазақстанның санитариялық-эпидемиологиялық қызметін одан әрі дамытуға бағытталған маңызды кәсіби алаң болды.
