Қазақ ұлттық медициналық университетіне 140 балл жинаған ең үздік талапкерлер түседі

27.05.2022 | просмотров: 966

ҚазҰМУ талапкерлер үшін түсу балы ең жоғары. 13 536 білім алушының 9947 бакалавр, 1837 интерн, 1412 резидент, 199 магистрант және 141 докторант. Сонымен қатар, 22 елден келген 1784 шетел студенті. Жыл сайын жоғары оқу орнында бакалаврлардың, дипломнан кейінгі деңгейдегі мамандардың және шетелдік студенттердің саны артып келеді.

Ағымдағы оқу жылында жетекші қазақстандық медицина университеті 3074 жаңа студентпен толықты. Оның ішінде 2367 бакалавриат бағдарламасына, 113 – магистратураға, 26 докторантураға және 578 резидентураға қабылданды.

Университеттің студенттерінің қатары тек үздіктердің үздігімен толығуда. 2021-2022 оқу жылының білім алу гранттарын 1400 студент иеленді. Нәтижесінде университетке еліміздегі ең жоғары – 140 балл жинаған студенттер қабылданды. Бұл ҰБТ ең жоғары нәтижесі. Қазір ол студенттер университетіміздің стоматология мамандығы бойынша білім алуда. Басқа жоғары оқу орындарында бұл көрсеткіш 139 балл.

Жалпы медицина және фармация факультеттеріне 133 балл жинаған студенттер іріктеліп алынды. Еліміздің басқа да жоғары оқу орындарының жалпы медицина және фармация факультеттеріне 117 және 125 балл төңірегінде жинаған студенттер қабылданған. Ал педиатрия мен қоғамдық денсаулық сақтау факультеттеріне 116 балл жинаған студенттер қабылданды. Бұл ҚазҰМУ әрдайым ең дарынды студенттердің таңдауы екенін дәлелдейді.