Қазақ ұлттық медицина университетінде өткен жылдардың барлық түлектерінің ауқымды шеруі өтті
Қазақстанның жетекші медициналық университетінің түлектері бақытты студенттік шақтарын еске алып, мерекелік атмосфера мен ностольгияға ену үшін өз білім ордасына жиналды. Қазақ ұлттық медицина университетінің барлық жылдардағы түлектерінің екінші жыл сайынғы мерекелік шеруі өтті.
Түлектер күнін мерекелеу университет ғимараттарының айналасында үлкен түлектер шеруімен басталды. Іс-шара Конкордия концерт залында жалғасын тауып, музыкалық ансамбльдер, оркестр және әртістер өнер көрсетті. ҚазҰМУ ректоры Марат Шоранов Түлектер күні жаңа байланыстар орнатуға, келешекте табысты мансап үшін жаңа қарым-қатынастар жасауға тамаша мүмкіндік екенін атап өтті.
«ҚазҰМУ – бұл бәріміздің ортақ үйіміз. ҚазҰМУ түлектері – үлкен медициналық бауырластық, уақыттар байланысы, ғалымдар мен оқытушылардың энергиясы. Мен жиналғандардың барлығын осы алтын мүмкіндікті пайдаланып, бір кездері сіздерге медицинаға жол ашқан ұстаздарыңызға құрмет көрсетуге шақырамын. Бүгінгі іс-шара ұрпақтар сабақтастығының айғағы іспеттес, әрқайсыңызға жаңа байланыстар орнатып, жаңа жолдас табуға, тәжірибе алмасуға шақырамын. Бүгінгі іс-шара – жаңа байланыстар орнатуға, табысты мансап үшін жаңа қарым-қатынастар жасауға тамаша мүмкіндік болмақ. Мен жиналғандардың барлығына білім ордасын жақсы көргені үшін, өз университетін тағы бір рет көруге уақыт бөлгені үшін шексіз алғыс білдіремін. Бұл күн қуанышты мерекелік атмосферада өтуіне тілектеспін», – деді ҚазҰМУ ректоры.
Мерекелік шараға Қазақ ұлттық медицина университетінің өткен жылдардағы жүздеген түлектері жиналды, білім ордасының шетелдік студенттері өз университетіне бейне үндеу жолдады. ҚазҰМУ Түлектері қауымдастығының төрағасы Убайдилла Датхаев еліміздің бас медициналық университеті түлектерінің барлық буындарының басын қосып, қауымдастықтың жыл өткен сайын нығайып келе жатқанын айрықша атап өтті.
«ҚазҰМУ түлектерінің қауымдастығы – бұл университетті тәмамадағаннан кейін әрбір түлек қосыла алатын қауымдастық. Қазір біз қауымдастық қызметін түрлендіріп, жаңа деңгейге көтерудеміз. Өз сайтымызды жаңарттық, қауымдастықтың жаңа құрметті мүшелерін төралқаға қостық, барлық түлектердің қатарға қосылуы, сайтқа тіркеліп, бірлестікпен үнемі байланыста болуы оңай әрі ыңғайлы болуы үшін арнайы форма әзірледік. Біз жаңа бренд өнімдерді әзірледік, Түлектер қауымдастығының марапаттары, медальдары мен төсбелгілері, Университет мақтанышы сынды құрметті атақтар жыл сайын өткен жылдардағы және соңғы бітіруші буынның үздік түлектеріне табысталады», – деді ҚазҰМУ Түлектерінің қауымдастығының төрағасы.
